Live Updates

سیلاب متاثرین کی بحالی حکومت پنجاب کی اولین ترجیح ہے : زاہد اختر زمان

بدھ 17 ستمبر 2025 22:37

لاہور(اُردو پوائنٹ اخبارتازہ ترین - آن لائن۔ 17 ستمبر2025ء) چیف سیکرٹری پنجاب زاہد اختر زمان نے کہا ہے کہ سیلاب متاثرین کی بحالی حکومت پنجاب کی اولین ترجیح ہے۔ ان خیالات کا اظہار انہوں نے سول سیکرٹریٹ لاہور میں منعقدہ ایک اہم اجلاس کی صدارت کرتے ہوئے کیا، جس میں صوبے بھر میں امداد اور بحالی کے اقدامات کا تفصیلی جائزہ لیا گیا۔ اجلاس میں ریلیف کمشنر نبیل جاوید نے امدادی پلان پر بریفنگ دی جبکہ ایڈیشنل چیف سیکرٹری، سیکرٹری خزانہ سمیت اعلیٰ حکام شریک تھے۔

ڈویژنل کمشنرز اور ڈپٹی کمشنرز ویڈیو لنک کے ذریعے اجلاس میں شامل ہوئے۔چیف سیکرٹری نے اوچ شریف کے متاثرہ علاقوں میں فوری طور پر مزید ٹینٹ اور راشن بھیجنے کی ہدایت کی اور ڈپٹی کمشنر بہاولپور کو امدادی سرگرمیوں کی براہ راست نگرانی کا حکم دیا۔

(جاری ہے)

انہوں نے کہا کہ وزیراعلیٰ پنجاب کی ہدایات کے مطابق متاثرین کے نقصانات کا مکمل ازالہ کیا جائے گا۔

اجلاس میں بتایا گیا کہ سیلاب سے متاثرہ 28 اضلاع میں جلد جامع سروے شروع کیا جائے گا، جس میں جانی و مالی نقصان، مکانات، فصلوں اور مویشیوں کی تباہی کا ریکارڈ تیار کیا جائے گا۔ اس مقصد کے لیے 2000 سے زائد ٹیمیں تشکیل دی جا رہی ہیں۔ چیف سیکرٹری نے ہدایت دی کہ ڈپٹی کمشنرز خود فیلڈ میں جا کر شفافیت یقینی بنائیں، ساتھ ہی نکاسی آب، صفائی، وبائی امراض کی روک تھام اور سڑکوں کی فوری بحالی پر زور دیا۔

ریلیف کمشنر کے مطابق اب تک 4500 سے زائد دیہات متاثر ہوئے ہیں، جبکہ 18 اضلاع میں سروے فوری اور 10 اضلاع میں 18 ستمبر کے بعد شروع کیا جا سکتا ہے۔ نارووال، سیالکوٹ، چنیوٹ، جھنگ، اوکاڑہ، ساہیوال اور سرگودھا سمیت کئی علاقوں میں متاثرین کی گھروں کو واپسی کا عمل شروع ہو چکا ہے۔ چیف سیکرٹری نے سیکرٹری مواصلات و تعمیرات کو متاثرہ سڑکوں کی مرمت اور بے گھر افراد کے لیے عارضی رہائش کا بندوبست یقینی بنانے کی ہدایت بھی دی۔