وزیراعلیٰ بلوچستان کی زیر صدارت گوادر میں پانی و بجلی کے مسائل سے متعلق اجلاس

بدھ 17 ستمبر 2025 20:15

کوئٹہ(اُردو پوائنٹ اخبارتازہ ترین - این این آئی۔ 17 ستمبر2025ء)وزیراعلیٰ بلوچستان میر سرفراز بگٹی کی زیر صدارت گوادر میں پانی و بجلی کے مسائل سے متعلق اہم اجلاس کے بعد شہر میں پانی ڈسٹریبیوشن کا نظام آئندہ گوادر ڈویلپمنٹ اتھارٹی کے حوالے کرنے کیلئے نئی لائنوں سے پانی کی فراہمی شروع کرنے کا فیصلہ کیا ہے جس کے تحت جی ڈی اے نے ہاؤس کنکشنز لگانے کے عمل کو تیز کر دیا ہے۔

ڈائریکٹر جنرل جی ڈی اے معین الرحمٰن خان کی ہدایت پر جی ڈی اے کے شعبہ واٹر سپلائی نے فوری اقدامات شروع کر دیے ہیں اور عوام سے اپیل کی گئی ہے کہ وہ ہاؤس کنکشن کے لیے جلد از جلد اپنی درخواستیں جمع کرائیں تاکہ نئی لائنوں کے ذریعے پانی کی فراہمی کا عمل تیز رفتاری سے مکمل کیا جا سکے۔اجلاس کے دوران ایم پی اے گوادر مولانا ہدایت الرحمٰن نے کنکشن فیس کے حوالے سے عوامی مشکلات کی نشاندہی کی اور اپنی طرف سے عوام کے ساتھ تعاون کا عندیہ بھی دیا۔

(جاری ہے)

اس کے ساتھ جی ڈی اے نے شادی کور تا چوڑ ڈگار مین ٹرانسمیشن لائن کے ذریعے پانی کی فراہمی کا آغاز کر دیا ہے۔ اگرچہ یہ لائن تاحال مکمل طور پر فعال نہیں ہو سکی، تاہم وزیراعلیٰ بلوچستان کی ہدایت پر اس پر کام مزید تیزی سے جاری ہے تاکہ شہر میں پانی کی قلت پر قابو پایا جا سکے اور عوام کو ہر صورت پانی کی فراہمی ممکن بنائی جا سکے۔