چیئرمین گوادر پورٹ نورالحق بلوچ سے کیسکو کے چیف ایگزیکٹو آفیسر یوسف شاہ کی ملاقات

بدھ 17 ستمبر 2025 22:40

کوئٹہ (اُردو پوائنٹ اخبارتازہ ترین - اے پی پی۔ 17 ستمبر2025ء) چیئرمین گوادر پورٹ نورالحق بلوچ سے کیسکو کے چیف ایگزیکٹو آفیسر یوسف شاہ نے ملاقات کی۔ ملاقات میں گوادر پورٹ، گوادر فری زون اور 1.2 ایم جی ڈی ڈیسالینیشن پلانٹ سمیت ضلع گوادر کو درپیش بجلی کے بحران کے حوالے سے معاملات زیر بحث آئے۔اس موقع پر چئیرمین گوادر بندرگاہ نے گوادر کو نیشنل گریڈ سے منسلک کرنے کے بعد پیش آنے والے مسائل اور بار بار بجلی کی اپ اینڈ ڈاؤن اور لوڈشیڈنگ پر تشویش کا اظہار کیا۔

(جاری ہے)

رہائشی علاقوں میں غیر اعلانیہ لوڈشیڈنگ، کم وولٹیج اور ٹرانسفارمرز کے بار بار خراب ہونے کے باعث عوام کو شدید مشکلات کا سامنا ہے۔ ملاقات میں اس بات پر زور دیا گیا کہ بجلی کے نظام کو اپ گریڈ کرنے اور ٹرانسفارمرز سمیت پرانی لائنوں کو تبدیل کرنے کی فوری ضرورت ہے تاکہ شہر اور مضافاتی علاقوں میں بلا تعطل بجلی فراہم کی جا سکے۔ عوامی شکایات کے حوالے سے چیئرمین گوادر پورٹ نورالحق بلوچ نے کہا کہ بجلی کے بحران نے شہریوں کی روزمرہ زندگی کے ساتھ ساتھ پانی کی فراہمی اور فشنگ انڈسٹری کو بھی متاثر کیا ہے، جس کے مستقل حل کے لیے وفاقی اور کیسکو بلوچستان کو مل کر فوری اقدامات کرنے ہوں گے۔