مغوی اسسٹنٹ کمشنر حنیف نورزئی بازیاب، وزیر اعلیٰ کے خصوصی طیارے کے ذریعے کوئٹہ منتقل

ڈپٹی کمشنر کیچ اور قبائلی شخصیات کی کوششیں رنگ لائیں اور مسلح افراد نے حنیف نورزئی کو بدھ کی شب رہا کردیا

جمعرات 18 ستمبر 2025 11:05

کیچ (اُردو پوائنٹ اخبارتازہ ترین - این این آئی۔ 18 ستمبر2025ء)بلوچستان کے ضلع کیچ سے ساڑے 3 ماہ قبل اغوا ہونے والے اسسٹنٹ کمشنر تمپ محمد حنیف نورزئی بازیاب ہوگئے، انہیں وزیر اعلیٰ کے خصوصی طیارے میں کوئٹہ پہنچایاگیا۔اسسٹنٹ کمشنر حنیف نورزئی کی بازیابی کے لیے ڈپٹی کمشنر کیچ اور قبائلی شخصیات کی کوششیں رنگ لائیں اور مسلح افراد نے حنیف نورزئی کو بدھ کی شب رہا کردیا۔

(جاری ہے)

ڈپٹی کمشنر کیچ کے مطابق اسسٹنٹ کمشنر تمپ حنیف نورزئی کو رواں سال 3 جون کوکیچ سے کوئٹہ آتے ہوئے مسلح افراد نے اغوا کیا تھا۔وہ اُس وقت اپنے خاندان، ڈرائیور اور محافظوں کے ہمراہ سفر پر تھے۔ اغوا کار صرف انہیں اپنے ساتھ لے گئے جبکہ ان کی اہلیہ اور محافظوں کو چھوڑ دیا۔اسسٹنٹ کمشنر کی رہائی کی اطلاع ملنے پر وزیراعلیٰ بلوچستان کے خصوصی طیارے نے رات ساڑے 10 بجے تربت میں لینڈ کیا جہاں سے اسسٹنٹ کمشنر حنیف نورزئی کو کوئٹہ پہنچایا گیا۔