عوامی فلاح و بہبود حکومت کی اولین ترجیح ہے، صوبائی وزیر خوراک

جمعرات 18 ستمبر 2025 20:40

پشاور (اُردو پوائنٹ اخبارتازہ ترین - اے پی پی۔ 18 ستمبر2025ء) وزیر خوراک خیبرپختونخوا ظاہر شاہ طورو نے منیجنگ ڈائریکٹر پختونخوا ہائی وے اتھارٹی اور متعلقہ افسران کے ہمراہ ولی انٹرچینج طورو روڈ کا دورہ کیا۔ اس موقع پر تحصیل صدر مردان الیاس طورو اور جہانگیر خان بھی موجود تھے۔ وفد نے ولی انٹرچینج سے طورو روڈ کا معائنہ کیا اور سڑک کی دوبارہ تعمیر اور مرمت پر غور کیا۔

صوبائی وزیر نے موقع پر موجود عوامی نمائندوں اور شہریوں کے مسائل بھی سنے اور ان کے فوری حل کے لیے احکامات جاری کیے۔

(جاری ہے)

اس موقع پر صوبائی وزیر کو بتایا گیا کہ مذکورہ روڈ پر مال بردار گاڑیوں کی آمدورفت زیادہ ہونے کی وجہ سے سڑک کی حالت خراب ہو چکی ہے۔ وزیر خوراک نے متعلقہ افسران کو ہدایت دی کہ عوامی مشکلات کے ازالے کے لیے سڑک کی دوبارہ پختگی اور مرمت کے لیے ایمرجنسی بنیادوں پر اقدامات اٹھائے جائیں۔

انہوں نے اس موقع پر کہا کہ عوامی فلاح و بہبود حکومت خیبرپختونخوا کی اولین ترجیح ہے اور تمام سرکاری اداروں کو عوامی خدمت میں بھرپور کردار ادا کرنا ہوگا۔ انہوں نے مزید کہا کہ ترقیاتی منصوبوں کی بروقت تکمیل صوبائی حکومت کی اولین ترجیحات میں شامل ہے اور اس سلسلے میں عملی اقدامات اٹھا رہی ہے۔