ایک ڈرامے میں والد کے قریبی دوست کی دوسری بیوی کا کردارادا کرنا پڑا، تارا محمود

جمعہ 19 ستمبر 2025 21:10

کراچی (اُردو پوائنٹ اخبارتازہ ترین - این این آئی۔ 19 ستمبر2025ء)معروف اداکارہ تارا محمود نے والد کے قریبی دوست کی دوسری بیوی کا کردار نبھانے کو مشکل لمحہ قرار دیا۔ تارا محمود نے ایک پوڈ کاسٹ میں اپنے کیریئر کے نشیب و فراز پر گفتگو کرتے ہوئے انکشاف کیا کہ ایک ڈرامے میں مجھے سینئر اداکار عثمان پیرزادہ کی دوسری بیوی کا کردار ادا کرنا پڑا، یہ کردار میرے لئے بہت مشکل تھا کیونکہ وہ میرے والد کے قریبی دوست ہیں۔

انہوں نے ہنستے ہوئے بتایا کہ سیٹ پر مجھے سمجھ نہیں آ رہا تھا کہ عثمان پیرزادہ کو انکل کہہ کر بلاں یا کچھ اور یہ صورتحال میرے لیے بیحد عجیب تھی۔انڈسٹری میں ابتدائی دنوں کے بارے میں بات کرتے ہوئے تارا نے بتایا کہ اس وقت کام کے مواقع محدود تھے اور میں ایک وقت میں ایک یا دو پروجیکٹس پر کام کرتی تھی، اس دوران سب سے بڑا مسئلہ تاخیر سے ملنے والی ادائیگیاں تھیں، جو کراچی جیسے مہنگے شہر میں اکیلے رہنے کے باعث مزید مشکل میں ڈال دیتی تھیں، سب سے زیادہ دکھ یہ ہوتا تھا کہ اپنے ہی پیسوں کے لیے بار بار پیچھے بھاگنا پڑتا تھا۔

(جاری ہے)

تارا نے کہا کہ آج حالات بہتر ہو گئے ہیں، کیونکہ میں بیک وقت کئی پروجیکٹس میں کام کر رہی ہوں، اس لیے اگر کسی ایک کی ادائیگی رک بھی جائے تو وہ اتنا بڑا مسئلہ نہیں ہوتا۔انہوں نے انڈسٹری پر تنقید کرتے ہوئے کہا کہ سپورٹنگ ایکٹرز کو وہ عزت اور پہچان نہیں دی جاتی جو انہیں ملنی چاہیے حالانکہ کسی بھی پروڈکشن میں ان کا کردار بنیادی حیثیت رکھتا ہے۔تارا نے انکشاف کیا کہ پانچ سال پہلے میرا شادی کرنے کا کوئی ارادہ نہیں تھا، مگر اب میں اس کیلئے تیار ہوں، اگر صحیح شخص ملا تو میں شادی کیلئے ہاں کر دوں گی۔