فاٹا ٹریبونل کے سابق چیئرمین اور ممبران کو ہٹانے کے خلاف دائر درخواستیں مسترد

تین برس کے لئے درخواست گزاروں کو تعینات کیا گیا مگر ایک سال بعد ہی درخواست گزاروں کو بغیر وجہ کے ہٹادیا گیا، وکیل

جمعہ 19 ستمبر 2025 20:05

پشاور (اُردو پوائنٹ اخبارتازہ ترین - این این آئی۔ 19 ستمبر2025ء)پشاور ہائیکورٹ نے فاٹا ٹریبونل کے سابق چیئرمین اور ممبران کو ہٹانے کیخلاف دائر درخواستیں مسترد کرتے ہوئے خارج کردیں۔جمعہ کو پشاور ہائیکورٹ میں جسٹس سید ارشد علی اور جسٹس فہیم ولی نے فاٹا ٹریبونل کے سابق چیئرمین اور ممبران کو ہٹانے کیخلاف دائر درخواستوں پر سماعت ہوئی۔

(جاری ہے)

وکیل درخواست گزار نے کہا کہ درخواست گزاروں میں فاٹا ٹریبونل کے چیئرمین اور ممبران شامل ہیں، تین برس کیلئے درخواست گزاروں کو فاٹا ٹریبونل میں تعینات کیا گیا، حکومت نے ایک سال بعد ہی درخواست گزاروں کو ہٹادیا ہے جو غیر قانونی ہے، بغیر کسی وجہ سے ان کو عہدوں سے ہٹایا گیا۔

ایڈیشنل ایڈووکیٹ جنرل اسد جان درانی نے کہا کہ ٹریبونل ممبران اور چیئرمین تعیناتی حکومت کا اختیار ہے، نوٹیفکیشن میں بھی لکھا ہے کہ تین سال یا حکومت کی مرضی ہے کہ کب تک ان کو تعینات کرتے ہیں، ٹریبونل میں اب نئے چیئرمین اور ممبران تعینات کئے گئے ہیں اور انھوں نے چارج بھی لیا ہے۔عدالت نے فریقین کے دلائل سننے کے بعد درخواست گزاروں کی استدعا مسترد کردی اور درخواست کو خارج کردیا۔