اداکار یوسف خان کو دنیا سے رخصت ہوئے 16برس بیت گئے

یوسف خان کو 2006 میں حکومت پاکستان نے صدارتی ایوارڈ تمغہ برائے حسن کارکردگی سے نوازا

ہفتہ 20 ستمبر 2025 10:55

لاہور(اُردو پوائنٹ اخبارتازہ ترین - این این آئی۔ 20 ستمبر2025ء) اداکار یوسف خان کو دنیا سے رخصت ہوئے 16برس بیت گئے۔گرجدار آواز، بارعب شخصیت کے مالک اداکار یوسف خان نے کئی فلموں میں یادگار کردار نبھائے، حقیقت سے قریب تر اداکاری کا خاصا رکھنے والے یوسف خان 10اگست 1931 کو مشرقی پنجاب کے شہر فیروز پور میں پیدا ہوئے۔یوسف خان نی1954 میں فلم پرواز سے فلمی کیریئر کا آغاز کیا، اس بہترین فلم میں مشہور اداکارہ صبیحہ خانم انکی ہیروئن کے روپ میں جلوہ گر ہوئیں، پاکستانی اداکارہ یوسف خان نے اردو اور پنجابی فلموں میں اپنے کرداروں کو اس طرح نبھایا کہ وہ پاکستان کے نامور اور پائے کے اداکار ثابت ہوئے۔

اداکار نے مجرم، حسرت، بھروسہ، فیصلہ اور نیا دور جیسی اردو فلموں میں اپنے فن کا بہترین لوہا منوایا، اداکار نی1962 میں فلم پہاڑن سے پنجابی فلموں میں اداکاری کا آغاز کیا،ملنگی، یارانہ، باو جی، ضدی، وارنٹ، ہتھکڑی، جگنی، شریف بدمعاش، قسمت، جبرو، خطرناک، حیدر خاں اور بڈھا گجر انکی سرفہرست فلمیں ہیں۔

(جاری ہے)

یوسف خان کو 2006 میں حکومت پاکستان نے صدارتی ایوارڈ تمغہ برائے حسن کارکردگی سے نوازا، اداکارہ کو فلم نگری کا سب سے بڑا اور معتبر ایوارڈ نگار اور نگار ملینیم ایوارڈ بھی دیا گیا، لیجنڈ اداکار یوسف خان 20ستمبر 2009 کو لاہور میں انتقال کر گئے تھے۔