ریجنل ٹرانسپورٹ اتھارٹی کوئٹہ کی کارروائی، کاغذات نامکمل ہونے پر 27 گاڑیوں کے چالان کر دیئے گئے

ہفتہ 20 ستمبر 2025 21:20

کوئٹہ (اُردو پوائنٹ اخبارتازہ ترین - اے پی پی۔ 20 ستمبر2025ء) صوبائی سیکرٹری ٹرانسپورٹ بلوچستان محمد حیات کاکڑ اور سیکرٹری ریجنل ٹرانسپورٹ اتھارٹی کوئٹہ علی درانی کی خصوصی ہدایت پر ریجنل ٹرانسپورٹ اتھارٹی (RTA) کوئٹہ اور ٹریفک پولیس پر مشتمل ٹیم نے ایئرپورٹ روڈ چورنگی پر گاڑیوں کی چیکنگ کی۔ اس کارروائی کے دوران درجنوں گاڑیوں کے کاغذات اور پرمٹ کی جانچ پڑتال کی گئی۔

(جاری ہے)

چیکنگ کے نتیجے میں 27 گاڑیوں کو نامکمل کاغذات پر چالان کیا گیا جبکہ ان کے دیگر ڈاکومنٹس تحویل میں لے لیے گئے۔ اس موقع پر موجود آر ٹی اے حکام کا کہنا تھا کہ تمام ٹرانسپورٹ مالکان کو اپنی گاڑیوں کے کاغذات، رجسٹریشن، روٹ پرمٹ اور دیگر قانونی تقاضے مکمل رکھنے چاہئیں تاکہ دورانِ چیکنگ کسی قسم کی کارروائی سے بچا جا سکے۔انہوں نے مزید کہا کہ غیر قانونی اور نامکمل دستاویزات رکھنے والوں کے خلاف سخت کارروائی جاری رہے گی اور گاڑی مالکان کو تنبیہ کی گئی کہ وہ اپنی گاڑیوں کے کاغذات اور پرمٹ کی تجدید جلداز جلد کروائیں۔