سعودی عرب یمن کو 368 ملین ڈالر اضافی اقتصادی امداد فراہم کرے گا

اتوار 21 ستمبر 2025 09:50

ریاض (اُردو پوائنٹ اخبارتازہ ترین - اے پی پی۔ 21 ستمبر2025ء) سعودی عرب نے یمن کو 368 ملین ڈالر کی اضافی اقتصادی امداد فراہم کرنے کا اعلان کیا ہے۔سعودی پریس ایجنسی کے مطابق یہ گرانٹ سعودی پروگرام برائے ترقی و تعمیر نو یمن کے ذریعے دی جائے گی۔ شاہ سلمان بن عبدالعزیز نے ولی عہد شہزادہ محمد بن سلمان کی جانب سے یمنی عوام کی امداد کے لیے سفارش کو منظور کر لیا ہے۔

(جاری ہے)

یمنی صدارتی کونسل کے سربراہ ڈاکٹر رشاد محمد العلیمی نے یمنی عوام کو درپیش شدید مالی مشکلات کے حوالے سے امداد کی درخواست کی تھی۔سعودی عرب کے ایوان شاہی سےجاری احکامات میں کہا گیا کہ اضافی امداد یمن کی تعمیر نو پروگرام کے لیے منظور کی گئی ہے۔ یہ امداد حکومتی بجٹ میں معاونت اور عدن میں شہزادہ محمد بن سلمان ہسپتال کے آپریشنل بجٹ کو پورا کرے گی جس سے یمنی حکومت کی اقتصادی اصلاحات کو تقویت ملے گی۔