والدین نے فلڈریلیف کیمپ میں پیدا ہونے والے بچے کا نام نواز شریف ،بچی کا نام مریم رکھ دیا

لاہور(اُردو پوائنٹ اخبارتازہ ترین - این این آئی۔ 22 ستمبر2025ء) وزیراعلیٰ پنجاب مریم نوازشریف بہاولنگر میں ٹیکنیکل ٹریننگ انسٹی ٹیوٹ فلڈ ریلیف کیمپ پہنچ گئیں۔ وزیر اعلیٰ مریم نواز شریف نے فلڈ ریلیف کیمپ میں پیدا ہونے والے بچوں کے والدین سے ملاقات کی ، مبارکباد اور بہت سی دعائیں دیں ۔فلڈریلیف کیمپ میں پیدا ہونے والے بچے کا نام نواز شریف اور بچی کا نام مریم رکھا گیا۔

وزیر اعلیٰ پنجاب مریم نوازشریف نے فلڈریلیف کیمپ میں صنعت زار مرکزکا دورہ کیا۔وزیر اعلیٰ پنجاب مریم نواز شریف نے سلائی کڑھائی کرنے والی خواتین سے خوشگوار موڈ میں گفتگو کی۔وزیر اعلیٰ مریم نوازشریف نے سلائی مشین پر کپڑے کی سلائی کی اور فریم میں لگے کپڑے پر سوئی سے کڑھائی بھی کی۔وزیر اعلیٰ مریم نواز شریف نے سلائی کڑھائی پر خوشی کا اظہارکیا۔

(جاری ہے)

وزیراعلیٰ پنجاب مریم نواز شریف نے فلڈ ریلیف کیمپ میں سیلاب متاثرین سے ملاقات کی ۔وزیراعلیٰ مریم نواز شریف نے سیلاب متاثرین مردو خواتین سے بات چیت کرتے ہوئے سہولتوں کی فراہمی بارے دریافت کیا ۔وزیراعلیٰ مریم نواز شریف فلڈریلیف کیمپ میں خواتین کے ساتھ بیٹھ گئیں ،بچوں سے اظہار شفقت کیااور عارضی کلاسوں کے معصوم بچوں میں گھل مل گئیں۔

وزیراعلیٰ پنجاب مریم نواز شریف سے ملنے پر معصوم بچوں نے اظہارمسرت کیااور پنسل سے بنے سکیچ پیش کئے ۔وزیراعلیٰ مریم نواز شریف نے سیلاب متاثرہ خواتین اور بچوں کو تحائف پیش کیے۔وزیر اعلیٰ مریم نواز شریف نے فلڈ ریلیف کیمپ عارضی ہسپتال میں داخل مریضوں کی عیادت کی اور تحائف پیش کئے۔وزیر اعلیٰ مریم نواز شریف نے فلڈ ریلیف کیمپ میں بچوں اور خواتین کے ساتھ دستر خوان پر کھانا بھی کھایا ۔

وزیراعلیٰ پنجاب مریم نواز شریف کو ڈی جی پی ڈی ایم اے اور ڈی سی بہاولنگر نے بریفنگ دی ۔بریفنگ میں بتایاگیا کہ سیلاب سے بہاولنگر کی 26یونین کونسل اورایک لاکھ سے زائد آبادی متاثرہوئی ہے۔ سیلاب متاثرہ علاقوں سے بروقت آبادی کا محفوظ انخلایقینی بنایا گیاہے۔ سیلاب متاثرین کیلئے 20فلڈ ریلیف کیمپ قائم کیے ہیں۔سیلاب متاثرین کیلئے ہیلتھ کاؤنٹر قائم، کلینک آن ویل، موبائل ہیلتھ یونٹ اورمصروف کارمیں40ہزار سے زائد سیلاب متاثرین کا علاج کیا گیاہے۔

سیلاب متاثرہ علاقوں سے مویشی محفوظ مقام پر منتقل کیے ہیں۔سیلاب متاثر ہ علاقوں میں 10کلو کے 15795بیگ فراہم کیے، 1198سائلیج اور399ٹن بھوسہ ،توڑی فراہم کی گئی ہے۔سیلاب کی آمد کے پیش نظر منہ کھر کی بیماری کے سدباب کیلئے 37لاکھ70ہزار چھوٹے بڑے جانوروں کی ویکسی نیشن کی گئی ہے۔منہ کھر کی بیماری سے بچاؤ کے لئے 5ملحقہ اضلاع سے بفر زون قائم کیے گئے ہیں۔