پاکستان ایک ناقابلِ تسخیر قوت ہے، پوری دنیا جان چکی ہے کہ ہمارا دفاع مضبوط اور ناقابلِ شکست ہے،صوبائی مشیر برائے امور نوجوانان و کھیل مینا مجید بلوچ

پیر 22 ستمبر 2025 23:30

کوئٹہ (اُردو پوائنٹ اخبارتازہ ترین - اے پی پی۔ 22 ستمبر2025ء) صوبائی مشیر برائے امور نوجوانان و کھیل مینا مجید بلوچ نے کہا ہے کہ پاکستان ایک ناقابلِ تسخیر قوت ہے، پوری دنیا جان چکی ہے کہ ہمارا دفاع مضبوط اور ناقابلِ شکست ہے۔ دشمن اپنی ناکامیوں کے باعث حواس باختہ ہوچکا ہے اور پاکستان کے خلاف بے بنیاد پروپیگنڈے پر اتر آیا ہے مگر قوم اور افواج مل کر ہر سازش کو ناکام بنائیں گے۔

ان خیالات کا اظہار انہوں نے کوئٹہ میں منعقدہ فرسٹ آل بلوچستان پی پی اے ایف کراٹے ٹورنامنٹ کی تقریب سے خطاب کرتے ہوئے کیا۔ انہوں نے کہا کہ یہ مقابلے نہ صرف نوجوانوں کو اپنی صلاحیتیں منوانے کے مواقع فراہم کرتے ہیں بلکہ صوبے میں کھیلوں کے فروغ اور قومی یکجہتی کے جذبے کو بھی اجاگر کرتے ہیں مینا مجید بلوچ نے کہا کہ افواجِ پاکستان کی قربانیاں رائیگاں نہیں جائیں گی۔

(جاری ہے)

پوری دنیا جانتی ہے کہ ہماری بہادر افواج نے دشمن کے رافیل طیارے گرا کر اپنی پیشہ ورانہ مہارت ثابت کی اور ہر محاذ پر بھارت کو شکست سے دوچار کیا۔ انہوں نے واضح کیا کہ بھارتی فنڈڈ تنظیمیں اپنے مذموم مقاصد میں کبھی کامیاب نہیں ہوسکتیں اور چند مٹھی بھر لوگ جو بیرونی ایجنڈے پر کام کررہے ہیں، جلد اپنے انجام کو پہنچیں گے انہوں نے نوجوانوں کو مخاطب کرتے ہوئے کہا کہ کسی دہشت گرد یا ملک دشمن عناصر کی سہولت کاری نہ کریں۔

اگر کوئی اپنے ملک، صوبے اور ریاست کے لیے کردار ادا نہیں کرسکتا تو کم از کم غداری جیسے فعل سے باز رہے۔ پاکستان ہمیشہ قائم رہنے کے لیے معرضِ وجود میں آیا تھا اور تاقیامت قائم و دائم رہے گا صوبائی مشیر نے پی پی اے ایف اور منتظمین کو ٹورنامنٹ کے کامیاب انعقاد پر مبارکباد دی اور کہا کہ حکومت بلوچستان نوجوانوں کو مثبت سرگرمیوں کی طرف راغب کرنے اور کھیلوں کے فروغ کے لیے ہر ممکن اقدامات کر رہی ہے۔ انہوں نے اعلان کیا کہ صوبے کے مختلف اضلاع میں کھیلوں کے مقابلے اور تربیتی پروگرامز کا سلسلہ مزید تیز کیا جائے گا تاکہ نوجوان اپنی صلاحیتوں کو بہتر بنا کر صوبے اور ملک کا نام روشن کرسکیں۔