انچارج وفاقی محتسب گوجرانوالہ ریجن کی سیالکوٹ میں کھلی کچہری،عوامی شکایات سن کر ان کے حل کے لیے احکامات جاری کیے

بدھ 24 ستمبر 2025 13:05

سیالکوٹ (اُردو پوائنٹ اخبارتازہ ترین - اے پی پی۔ 24 ستمبر2025ء) وفاقی محتسب سیکرٹریٹ ریجن آفس گوجرانوالہ کے انچارج ملک مشتاق احمد اعوان نے ضلع کونسل ہال سیالکوٹ میں کھلی کچہری منعقد کی جس میں لوگوں نے بڑی تعداد میں بجلی، گیس، نادرا، پاسپورٹ آفس، پی ٹی سی ایل، پوسٹل سروسز اور دیگر وفاقی محکموں کے حوالے سے اپنی شکایات پیش کیں۔ ملک مشتاق احمد اعوان نے نہ صرف شکایات کو بغور سنا بلکہ موقع پر ہی متعلقہ افسران کو احکامات جاری کرتے ہوئے مسائل کے فوری حل کو یقینی بنایا۔

انہوں نے اس موقع پرذرائع ابلاغ کے نمائندوں سے گفتگو کرتے ہوئے کہا کہ وفاقی محتسب کا ادارہ عوام کو مفت اور تیز رفتار انصاف فراہم کرنے کے لیے دن رات سرگرم عمل ہے، شہریوں کو یہ اعتماد ہونا چاہیے کہ ان کی شکایات سننے اور حل کرنے کے لیے ایک مؤثر فورم موجود ہے جہاں کسی قسم کی فیس یا پیچیدہ کارروائی کے بغیر داد رسی کی جاتی ہے۔

(جاری ہے)

ملک مشتاق احمد اعوان نے کہا کہ وفاقی محتسب اعجاز قریشی نے واضح ہدایات جاری کر رکھی ہیں کہ عوام کو بروقت ریلیف فراہم کرنے کے لیے کسی بھی قسم کی تاخیر یا سستی برداشت نہیں کی جائے گی، اسی لیے ریجنل دفاتر کو پابند کیا گیا ہے کہ وہ مختلف اضلاع میں جا کر کھلی کچہریوں کے ذریعے لوگوں کے مسائل سنیں اور موقع پر ہی ان کے حل کے لیے اقدامات کریں۔

انہوں نے شہریوں پر زور دیا کہ وہ بلا جھجک اپنی شکایات وفاقی محتسب کے دفتر یا آن لائن پورٹل کے ذریعے بھی درج کروائیں تاکہ انہیں بروقت انصاف مل سکے۔کھلی کچہری میں آنے والے شہریوں نے اپنے مسائل کے فوری ازالے پر اطمینان کا اظہار کیا اور کہا کہ یہ ایک خوش آئند اقدام ہے جس سے غریب اور متوسط طبقے کے لوگوں کو اپنے حقوق کے حصول میں سہولت ملی ۔

شہریوں نے بتایا کہ اس سے قبل وہ اپنے مسائل کے حل کے لیے مختلف دفاتر کے چکر کاٹتے رہتے تھے لیکن اب ایک ہی فورم پر ان کی شکایات سنی جا رہی ہیں اور فوری احکامات بھی جاری ہو رہے ہیں۔اس موقع پر ضلعی انتظامیہ کے افسران بھی موجود تھے جنہوں نے وفاقی محتسب کے ساتھ بھرپور تعاون کیا۔ ضلعی کونسل ہال میں شکایات کے اندراج اور کارروائی کے لیے خصوصی کاؤنٹر قائم کیے گئے جہاں عملہ شہریوں کو رہنمائی فراہم کرتا رہا۔