Live Updates

دریائے راوی، ستلج اور چناب میں سیلاب کے باعث ہونے والے نقصانات کی رپورٹ جاری

جمعرات 25 ستمبر 2025 13:43

لاہور (اُردو پوائنٹ اخبارتازہ ترین - اے پی پی۔ 25 ستمبر2025ء) پی ڈی ایم اے پنجاب نے دریائے راوی، ستلج اور چناب میں سیلاب کے باعث ہونے والے نقصانات کی رپورٹ جاری کر دی۔ ریلیف کمشنر پنجاب نبیل جاویدکے مطابق پنجاب کے 27 اضلاع جبکہ4700 سے زائد موضع جات سیلاب سے متاثر ہو ئے ہیں۔ دریائوں میں سیلابی صورتحال کے باعث مجموعی طور پر 47 لاکھ 60 ہزار لوگ متاثر ہوئے۔

انہوں نے بتایا کہ سیلاب سے متاثرہ اضلاع میں 271 ریلیف کیمپس قائم کیے گئے ہیں۔ ان ریلیف کیمپس میں شہریوں کو کھانا اور تمام تر بنیادی سہولیات فراہم کی جا رہی ہیں۔متاثر ہونے والے اضلاع میں 300 میڈیکل کیمپس بھی قائم کیے گئے ہیں۔اب تک سیلاب میں پھنس جانے والے 26 لاکھ 38 ہزار لوگوں کو محفوظ مقامات پر منتقل کیا گیا ہے۔

(جاری ہے)

اس کے علاوہ مویشیوں کو علاج معالجے کی سہولت فراہم کرنے کے لیے 283 ویٹرنری کیمپس قائم کیے گئے ہیں اورمتاثرہ اضلاع میں ریسکیو و ریلیف سرگرمیوں میں 21 لاکھ 17 ہزار جانوروں کو محفوظ مقامات پر منتقل کیا گیا ہے۔

ریلیف کمشنر کے مطابق حالیہ سیلاب سے مختلف حادثات میں 134 شہری جاں بحق اور 13 افراد زخمی ہوئے۔انہوں نے کہا کہ وزیر اعلی پنجاب کی ہدایات کے پیش نظر شہریوں کے نقصانات کا ازالہ کیا جائے گا۔متاثرین کے نقصانات کاتخمینہ لگانے کے لیے سروے کا آغاز ہو چکا ہے۔اس کے لیے شفافیت اور آسان طریقہ کار سے شہریوں کے نقصانات کا ازالہ کیا جائے گا۔