انجینئر رشید کو تہاڑ جیل میں سخت ہراساں کیا جا رہا ہے، اے آئی پی

جمعرات 25 ستمبر 2025 16:56

نئی دہلی (اُردو پوائنٹ اخبارتازہ ترین - اے پی پی۔ 25 ستمبر2025ء) بھارت کے غیر قانونی زیر تسلط جموں وکشمیر میں عوامی اتحاد پارٹی (اے آئی پی)نے کہا ہے کہ نئی دہلی کی تہاڑ جیل میں غیر قانونی طور پر نظر بند تنظیم کے صدر اور رکن بھارتی پارلیمنٹ انجینئر رشید کو سخت ہراساں کیا جا رہا ہے۔

(جاری ہے)

کشمیرمیڈیاسروس کے مطابق اے آئی پی نے سرینگر میں جاری ایک بیان میں کہا کہ جیل حکام نے انجینئر رشید کو 18 اور 19 ستمبر کوسخت ہراساں کیا ،انہیں محض اس وجہ سے ہراساں کیا گیا کیونکہ انہوں نے تذلیل اور تشدد کا نشانہ بنانے کے حوالے سے جیل سپر نٹنڈنٹ کے خلاف اپنی شکایت واپس لینے سے انکار کر دیاہے۔

پارٹی کے ترجمان انعام النبی نے کہا کہ سنگین جرائم میں ملوث دو قیدیوں نے انجینئر رشید پر 31 اگست کو قاتلانہ حملہ کیا تھا، جیل سپر نٹنڈنٹ نے واقعے کی شکایت اعلیٰ حکام تک پہنچانے کے بجائے اسے دبانے کی کوشش کی ۔ جیل سپر نٹنڈنٹ نے انجینئر رشید کے وکیل ایڈووکیٹ حسنین خواجہ سے ملاقات نہیں کی اور انہیں ڈیڑھ گھنٹے سے زائد انتظار کرایا۔ بعد ازاں، دوسرے روز نصف درجن اہلکا ر انجینئر رشید کے سیل میں داخل ہو گئے اور انہیں سخت ہراساں کیا۔