راولپنڈی میں الیکٹرک بسوں کے منصوبے پر اجلاس، عوام کو جدید سفری سہولیات دینے کا عزم

ہفتہ 27 ستمبر 2025 19:20

راولپنڈی (اُردو پوائنٹ اخبارتازہ ترین - اے پی پی۔ 27 ستمبر2025ء) راولپنڈی میں الیکٹرک بسوں کے منصوبے کے حوالے سے ایک اہم اجلاس منعقد ہوا جس میں پارلیمانی نمائندگان، مسلم لیگ (ن) کے رہنما اور ضلعی حکام نے شرکت کی۔ اجلاس میں شہریوں کو ماحول دوست اور جدید سفری سہولتیں فراہم کرنے کے لیے عملی اقدامات پر غور کیا گیا۔اجلاس کے شرکاء میں رکن قومی اسمبلی طاہرہ اورنگزیب، ملک ابرار، انجینئر قمرالاسلام، پارلیمانی سیکرٹری فرح ناز اکبر، سیکرٹری ایمرجنسی سروسز پنجاب ضیاء اللہ شاہ، پارلیمانی سیکرٹری محکمہ اوقاف ملک افتخار، چیئرمین انسپکشن ٹیم وزیر اعلیٰ پنجاب راجہ محمد حنیف ایڈووکیٹ، پارلیمانی سیکرٹری اطلاعات و ثقافت پنجاب شازیہ رضوان، سابق میئر سردار نسیم احمد خان، سابق ایم این اے حاجی پرویز، اراکین صوبائی اسمبلی چوہدری نعیم اعجاز، ملک منصور افسر، شوکت بھٹی، چوہدری عمران الیاس، زیب النساء اعوان، تحسین فواد، طاہرہ مشتاق، عاصمہ ناز عباسی اور رفعت عباسی شامل تھے۔

(جاری ہے)

اجلاس میں مسلم لیگ (ن) کے رہنما پیرزادہ راحت قدوسی اور فاروق خٹک سمیت دیگر شخصیات نے بھی شرکت کی۔شرکاء نے کہا کہ راولپنڈی میں الیکٹرک بسوں کا آغاز ایک انقلابی اقدام ہوگا جس سے ٹریفک دباؤ کم کرنے اور ماحولیاتی آلودگی پر قابو پانے میں مدد ملے گی۔ انہوں نے مزید کہا کہ یہ منصوبہ وزیر اعلیٰ پنجاب کے وژن کے مطابق ہے جس کے تحت عوام کو جدید اور معیاری سفری سہولتیں فراہم کرنے کے لیے حکومت دن رات منصوبہ بندی کر رہی ہے اور عملی اقدامات اٹھا رہی ہے۔

اجلاس میں اس بات پر بھی زور دیا گیا کہ عوامی فلاح و بہبود کے منصوبوں پر حکومت کی خصوصی توجہ ہے اور الیکٹرک بس سروس جیسے اقدامات نہ صرف شہریوں کے لیے آسانی پیدا کریں گے بلکہ بین الاقوامی معیار کی سہولتوں کی فراہمی کی طرف بھی ایک بڑا قدم ہیں۔ذرائع کے مطابق منصوبے پر عملی پیش رفت آئندہ چند ہفتوں میں شروع کر دی جائے گی اور شہری جلد ہی جدید، آرام دہ اور ماحول دوست الیکٹرک بسوں میں سفر کر سکیں گے۔\378