بھارت، مریض کے معدے سے 29 چمچ، 19 ٹوتھ برش اور قلم نکال دئیے گئے

اتوار 28 ستمبر 2025 14:40

نئی دہلی (اُردو پوائنٹ اخبارتازہ ترین - این این آئی۔ 28 ستمبر2025ء)بھارت کی ریاست اتر پردیش کے شہر غازی آباد میں ڈاکٹروں نے ایک مریض کے معدے سے 29 اسٹیل کے چمچ، 19 ٹوتھ برش اور دو قلم نکال دیے۔ اس غیر معمولی آپریشن نے مقامی نشہ چھڑا مرکز (ڈی ایڈکشن سینٹر)کی صورتحال پر سنگین سوالات کھڑے کر دیے ہیں۔35 سالہ سچن نامی مریض نے بتایا کہ اسے مرکز میں داخل کیے جانے اور وہاں ملنے والی کم خوراک پر شدید غصہ آتا تھا، سینٹر کے عملے کی جانب سے کھانا بہت کم دیا جاتا تھا اور گھر والوں کی طرف سے لایا گیا کھانا بھی اکثر ان تک نہیں پہنچتا تھا۔

(جاری ہے)

سچن نے انکشاف کیا کہ احتجاجا اس نے کچن سے اسٹیل کے چمچ چوری کر کے باتھ روم میں لے جانا شروع کیے، جہاں وہ انہیں توڑ کر پانی کے ساتھ نگل لیتا تھا۔شدید پیٹ درد کے بعد مریض کو اسپتال منتقل کیا گیا جہاں اسکین کے دوران معدے میں یہ تمام اشیا موجود ہونے کا انکشاف ہوا۔ ڈاکٹروں نے بتایا کہ اینڈوسکوپی کے ذریعے ان چیزوں کو نکالنے کی کوشش ناکام رہی کیونکہ اشیا کی تعداد بہت زیادہ تھی، بعدازاں آپریشن کے ذریعے انہیں کامیابی سے باہر نکال لیا گیا۔ڈاکٹروں کے مطابق اس قسم کا رویہ عام طور پر نفسیاتی مسائل کا شکار افراد میں پایا جاتا ہے۔