چیف منسٹرانسپیکشن ٹیم تمام ترقیاتی منصوبوں کا جائزہ لے کر موثر اکاؤنٹبلٹی یقینی بنائے ، وزیر اعلیٰ بلوچستان

پیر 29 ستمبر 2025 16:31

کوئٹہ (اُردو پوائنٹ اخبارتازہ ترین - اے پی پی۔ 29 ستمبر2025ء) وزیر اعلیٰ بلوچستان میر سرفراز بگٹی نے چیف منسٹر انسپیکشن ٹیم (سی ایم آئی ٹی) کو ہدایت کی ہے کہ صوبے کے تمام ترقیاتی منصوبوں کا باریک بینی سے جائزہ لے کر جاری سکیموں کی موثر اکاؤنٹبلٹی یقینی بنائی جائے۔ انہوں نے پیر کو پی ایس ڈی پی سے متعلق اجلاس کے دوران سی ایم آئی ٹی کی جانب سے پیش کی گئی کارکردگی رپورٹ پر اظہار خیال کرتے ہوئے بعض غیر معیاری کام والی اور ادھوری سکیموں پر برہمی کا اظہار کیا۔

وزیر اعلیٰ بلوچستان نے کہا کہ عوامی فنڈز کی ایک ایک پائی عوام کی امانت ہے اور ناقص و غیر معیاری کام والے منصوبے کسی صورت برداشت نہیں کیے جائیں گے۔ انہوں نے انتباہ کیا کہ غیر معیاری کام والی سکیموں کے ذمہ دار افسران اور ٹھیکیداروں کے خلاف سخت کارروائی کی جائے گی اور جوابدہی کے عمل کو مزید سخت اور شفاف بنایا جائے گا ۔

(جاری ہے)

وزیر اعلیٰ بلوچستان نے کہ صوبائی حکومت کسی کو عوامی وسائل لوٹنے یا ترقیاتی منصوبوں میں غفلت برتنے کی اجازت نہیں دے گی۔

انہوں نے ہدایت کی کہ سی ایم آئی ٹی تمام سکیموں کا باقاعدہ فیلڈ وزٹ کرے اور اس کا آغاز میرے اپنے علاقے بیکڑ سے کیا جائے۔ انہوں نے خبردار کیا کہ مفاد عامہ اور عوام کی بہبود کے لئے ہونے والے ترقیاتی عمل میں جو افسران یا ٹھیکیدار اپنے فرائض میں کوتاہی کے مرتکب پائے گئے ان کے خلاف سخت کارروائی کی جائے گی ۔ وزیر اعلیٰ بلوچستان نے کہا کہ سی ایم آئی ٹی بغیر کسی دباؤ کے اپنے امور سرانجام دے، ایک ایک پائی عوام کی امانت ہے جس میں خیانت کسی صورت قابل برداشت نہیں۔