وزیراعلیٰ مریم نوازشریف نے مسلم لیگ (ن) کو اپنی سیاست سے مضبوط کیا ‘ ملک افضل کھوکھر

منگل 30 ستمبر 2025 13:46

رائے ونڈ(اُردو پوائنٹ اخبارتازہ ترین - این این آئی۔ 30 ستمبر2025ء) مسلم لیگ (ن) کے مرکزی رہنما و رکن قومی اسمبلی ملک افضل کھوکھر نے کہا ہے کہ وزیر اعلیٰ پنجاب مریم نواز شریف نے مسلم لیگ (ن) کو اپنی سیاست سے مضبوط کیا، پی ٹی آئی دور حکومت میں لوگوں کا استحصال کیا گیا، مسلم لیگ (ن) نے سیاست کے لیے قربانیاں دیں۔

(جاری ہے)

انہوں نے اپنے بیان میں کہا کہ جب پوری پارٹی قید تھی اس وقت مریم نواز نے پارٹی سنبھالی، کراچی سے کوئٹہ تک (ن) لیگ کو مریم نواز نے سنبھالا، ان کی قیادت میں پنجاب ترقی یافتہ پنجاب بنے گا،تنقید کرنے والوں کو مریم نواز کے منصوبوں تک پہنچنے کے لیے بڑی محنت کرنا پڑے گی۔

انہوں نے کہا کہ ڈیڑھ سال میں مریم نواز نے خدمت کی سیاست کو عروج دیا، انہوں نے پنجاب میں صحت کے مختلف منصوبے شروع کیے، پنجاب میں لوگوں کو ان کی دہلیز پر ادویات مل رہی ہیں، آج میزبان پنجاب حکومت اور مہمان عوام ہے۔ملک افضل کھوکھر نے کہا کہ مسلم لیگ (ن) خدمت کی سیاست پر یقین رکھتی ہے، مسلم لیگ (ن) نے ہمیشہ عام آدمی کے مسائل کو حل کرنے پر توجہ دی ۔جبکہ پی ٹی آئی دور حکومت میں لوگوں کا استحصال کیا گیا، مسلم لیگ (ن) نے سیاست کے لیے قربانیاں دیں، جیلیں کاٹیں، مسلم لیگ (ن) نے ہمیشہ عام آدمی کے مسائل کو حل کرنے پر توجہ دی ہے۔