پہلا ٹی ٹوئنٹی: ٹم رابنسن کی سنچری رائیگاں، آسٹریلیا 6 وکٹ سے فتحیاب

بدھ 1 اکتوبر 2025 22:55

ماؤنٹ مینگنوئی (اُردو پوائنٹ اخبارتازہ ترین - این این آئی۔ 01 اکتوبر2025ء) پہلے ٹی ٹوئنٹی میچ میں آسٹریلیا نے نیوزی لینڈ کو 6 وکٹ سے شکست دے دی۔ماؤنٹ مینگنوئی میں کھیلے گئے میچ میں آسٹریلیا نے ٹاس جیت کر نیوزی لینڈ کو پہلے بیٹنگ کرنے کی دعوت تو اس کی ابتدائی تین وکٹیں صرف چھ رنز پر گر گئیں۔بعد ازاں ٹم رابنسن نے ڈیرل مچل (34)کے ساتھ 92 اور بیون جیکبس (20)کے ساتھ 64 رنز کی شراکت داری کرکے ٹیم کا اسکور چھ وکٹوں کے نقصان پر 181 رنز تک پہنچادیا۔

رابنسن نے اپنی پہلی ٹی ٹوئنٹی انٹرنیشنل سنچری اسکور کی۔ انہوں نے پانچ چھکوں اور چھ چوکوں کی مدد سے 66 گیندوں پر 106 رنز بنائے اور ناقابل شکست رہے۔آسٹریلیا کی جانب سے بین ڈوریشس نے دو جبکہ جوش ہیزل ووڈ اور میتھیو شارٹ نے ایک ایک وکٹ حاصل کی۔

(جاری ہے)

آسٹریلیا نے 182 رنز کا ہدف باآسانی چار وکٹوں کے نقصان پر 16.3 اوورز میں حاصل کرلیا۔ کپتان مچل مارش 85 رنز بناکر نمایاں رہے۔

ٹریوس ہیڈ 31، میتھیو شارٹ 29 اور ایلکس کیری سات رنز بناکر آؤٹ ہوئے۔ ٹم ڈیوڈ 21 اور مارکس اسٹوئنس چار رنز بناکر ناٹ آؤٹ رہے۔نیوزی لینڈ کی جانب سے میٹ ہینری نے دو جبکہ فولکس اور جیمی سن نے ایک ایک وکٹ حاصل کی۔آسٹریلیا کو تین ٹی ٹوئنٹی میچز کی سیریز میں 0-1 کی برتری حاصل ہوگئی ہے۔ دونوں ٹیموں کے مابین دوسرا ٹی ٹوئنٹی تین اکتوبر کو کھیلا جائے گا۔