پنڈی ٹیسٹ: پاکستان نے کھانے کے وقفے پر 1 وکٹ کے نقصان پر 95 رنز بنالیے

پاکستان کو دو ٹیسٹ میچوں کی سیریز میں ایک صفر کی سبقت حاصل ہے

ذیشان مہتاب پیر 20 اکتوبر 2025 12:02

پنڈی ٹیسٹ: پاکستان نے کھانے کے وقفے پر 1 وکٹ کے نقصان پر 95 رنز بنالیے

راولپنڈی (اردو پوائنٹ تازہ ترین اخبار ۔ 20 اکتوبر 2025ء ) پاکستان کی جنوبی افریقا کے خلاف دوسرے اور آخری ٹیسٹ کی پہلی اننگز میں بیٹنگ جاری ہے اور گرین کیپس نے کھانے کے وقفے پر ایک وکٹ کے نقصان پر 95 رنز بنالیے ہیں۔ راولپنڈی کرکٹ اسٹیڈیم میں کھیلے جا رہے میچ میں پاکستان کے کپتان شان مسعود نے ٹاس جیت کر پہلے بیٹنگ کا فیصلہ کیا۔ پاکستان کی جانب سے عبداللہ شفیق اور امام الحق نے اننگز کا آغاز کیا۔

پاکستان کی پہلی وکٹ 35 رنز پر گرگئی، امام الحق سترہ رنز بناکر پویلین لوٹ گئے۔ قومی ٹیم کے کپتان شان مسعود کا کہنا تھا آج کے میچ کے لیے ٹیم میں ایک تبدیلی کی گئی ہے، ٹیم میں آصف آفریدی کو شامل کیا ہے جبکہ حسن علی کو آرام دیا گیا ہے۔ پاکستان کی جانب سے آصف آفریدی ٹیسٹ ڈیبیو کریں گے، شاہین آفریدی نے آصف آفریدی کو ٹیسٹ کیپ دی۔

(جاری ہے)

آصف آفریدی نے 39 سال 299 دن کی عمر میں ٹیسٹ ڈیبیو کیا۔

جنوبی افریقا کے کپتان ایڈن مارکرم کا کہنا تھا ہم ٹاس جیتتے تو بیٹنگ ہی کرتے، پنڈی ٹیسٹ کے لیے ٹیم میں دو تبدیلیاں کی ہیں، کیشو مہاراج، مارکو جینسن کو ٹیم میں شامل کیا گیا ہے۔ خیال رہے کہ دو ٹیسٹ میچوں کی سیریز میں پاکستان کو ایک صفر کی سبقت حاصل ہے، پاکستان نے لاہور ٹیسٹ میں جنوبی افریقا کو 93 رنز سے شکست دی تھی۔