ویمنز کرکٹ ورلڈ کپ، مسلسل تیسری شکست پر بھارتی ٹیم سخت تنقید کی زد میں آگئی

پیر 20 اکتوبر 2025 12:50

نئی دہلی (اُردو پوائنٹ اخبارتازہ ترین - این این آئی۔ 20 اکتوبر2025ء) انٹرنیشنل کرکٹ کونسل (آئی سی سی) ویمنز کرکٹ ورلڈ کپ میں مسلسل تیسری شکست پر بھارتی ویمن کرکٹ ٹیم سخت تنقید کی زد میں آگئی۔انگلینڈ سے شکست کے بعد بھارتی ویمن ٹیم کا ٹاپ فور میں پہنچنا دشوار ہو گیا ،بھارتی میڈیا کے مطابق بھارتی ویمن کرکٹرز کو یکساں میچ فیس ملنے پر بھی سخت تنقید کا سامنا ہے۔

ویرات کوہلی، روہت شرما اور شبمن گل سے جتوانے اور سنچری کی توقع رکھی جاتی ہے، ویمن کرکٹرز کو بھی پھر توقعات پر پورا اترنا چاہیے۔بھارتی میڈیا نے کہا کہ بھارتی ٹیم کا نیوزی لینڈ اور بنگلادیش کے خلاف میچ ڈو آر ڈائی ہے، آسٹریلیا جنوبی افریقہ اور انگلینڈ سے مسلسل شکست ہوئی، سمریتی مندھنا اور ہرمن پریت پر تنقید کیوں نہیں ہو سکتی انہیں یکساں میچ فیس ملتی ہے۔

(جاری ہے)

واضح رہے کہ بھارتی کرکٹ بورڈ نے 2022 میں یکساں میچ فیس دینے کا اعلان کیا تھا۔ مینز اینڈ ویمنز کرکٹرز کو ٹیسٹ کا 15 لاکھ، ون ڈے کا 6 لاکھ جبکہ ٹی ٹوئنٹی کے 3 لاکھ بھارتی روپے ملتے ہیں۔مینز اینڈ ویمنز کے سینٹرل کنٹریکٹ میں زمین آسمان کا فرق پایا جاتا ہے، مینز کی اے پلس کیٹیگری کو 7 کروڑ بھارتی روپے سالانہ ملتے ہیں جبکہ اے کیٹیگری کو 5 کروڑ، بی کو 3 کروڑ اور سی کیٹیگری کو ایک کروڑ روپے بھارتی روپے سالانہ ملتے ہیں۔ویمنز سینٹرل کنٹریکٹس میں اے کیٹیگری کو 50 لاکھ، بی کو 30 لاکھ اور سی کیٹیگری کو 10 لاکھ روپے بھارتی روپے سالانہ ملتے ہیں۔