Live Updates

علی امین گنڈاپور نے صوبائی وزراء عاقب اللّٰہ و فیصل ترکئی کے استعفے منظور کر لیے

جمعرات 2 اکتوبر 2025 04:10

پشاور (اُردو پوائنٹ اخبارتازہ ترین - این این آئی۔ 02 اکتوبر2025ء)وزیرِ اعلیٰ خیبر پختونخوا علی امین گنڈاپور نے صوبائی وزراء عاقب اللّٰہ اور فیصل ترکئی کے استعفے منظور کر لیے۔وزیر اعلیٰ خیبر پختونخوا کے ترجمان کے مطابق وزیرِ اعلیٰ کے پی علی امین گنڈاپور نے عاقب اللّٰہ اور فیصل ترکئی سے استعفے مانگے تھے۔واضح رہے کہ گزشتہ روز خیبر پختون خوا کابینہ کے 2 وزراء فیصل ترکئی اور عاقب اللّٰہ نے اپنی وزارتوں سے استعفیٰ دے دیا تھا۔

وزیرِ اعلیٰ علی امین گنڈاپور دونوں وزراء کی کارکردگی سے مطمئن نہیں تھے اور ان کی وزارتیں تبدیل کرنا چاہتے تھے۔وزیرِ اعلیٰ نے جب انہیں بتایا تو دونوں نے اپنے استعفے علی امین گنڈاپور کو ارسال کر دیے، جس کے بعد تحریکِ انصاف حکومت میں ایک مرتبہ پھر اختلافات اور گروپ بندی میں شدت آ گئی۔

(جاری ہے)

صوبائی وزیر ابتدائی و ثانوی تعلیم فیصل خان ترکئی نے اپنے استعفے میں کہا ہے کہ وزیرِ تعلیم کی حیثیت سے میں نے اپنے قائد عمران خان کے ویڑن کے مطابق شفافیت، میرٹ اور کارکردگی کو یقینی بنانے کی بھرپور کوشش کی۔

انہوں نے کہا کہ یہ میرے لیے اعزاز کی بات رہی کہ مجھے تعلیم کے شعبے میں اصلاحات اور ترقی کے عمل کا حصہ بنایا گیا تاہم میں پی ٹی ا?ئی اور عمران خان کے ویڑن کے ساتھ اپنی وابستگی جاری رکھوں گا۔اسی طرح صوبائی وزیرِ آبپاشی عاقب اللّٰہ خان نے بھی اپنے استعفے میں اعتراف کیا کہ وزارت کے دوران میں نے عمران خان کے اعتماد پر پورا اترنے اور محکمہ آبپاشی کو جدید خطوط پر استوار کرنے کے لیے بھرپور جدوجہد کی۔