وزیر اعلیٰ خیبر پختونخوا کے معاون خصوصی برائے ابتدائی وثانوی تعلیم محمد عاصم خان نے وزارت تعلیم کا چارج سنبھال لیا

جمعہ 3 اکتوبر 2025 15:30

پشاور (اُردو پوائنٹ اخبارتازہ ترین - اے پی پی۔ 03 اکتوبر2025ء) وزیر اعلیٰ خیبر پختونخوا کے معاون خصوصی برائے ابتدائی و ثانوی تعلیم محمد عاصم خان نے وزارت تعلیم کا چارج سنبھال لیا۔ اس موقع پر مختلف وفود نے ان کو وزارت کا قلمدان ملنے پر مبارکباد دی اور ان کے لیے نیک خواہشات کا اظہار کیا۔ معاون خصوصی محمد عاصم خان نے وفود سے اظہار خیال کرتے ہوئے کہا کہ وزیراعلی خیبر پختونخوا علی امین خان گنڈاپور نے ان پر جو اعتماد کیا ہے ان پر پورا اترنے کی وہ بھرپور کوشش کریں گے اور محکمہ تعلیم می وزیر اعلی خیبر پختونخوا علی امین خان گنڈاپور کے گڈ گورننس روڈ میپ کے مطابق اصلاحات متعارف کروانے بشمول صوبے کے تمام بچوں کو اعلیٰ تعلیمی سہولیات ان کی دہلیز پر فراہمی کے لیے ہر ممکن کوشش کریں گے۔

(جاری ہے)

انہوں نے کہا کہ سکولوں سے باہر بچوں کو سکولوں میں لانے اور سکولوں میں موجود طلباء و طالبات کو کوالٹی ایجوکیشن کی فراہمی ان کی اولین ترجیح ہے۔ انہوں نے مزید کہا کہ تعلیم ہر انسان کا بنیادی حق ہے اور حکومت خیبر پختونخوا تعلیم کو اولین ترجیح دے رہی ہے اور اس ضمن میں انقلابی اقدامات اٹھائے جائیں گے۔ محمد عاصم خان نے کہا کہ اساتذہ کے مسائل حل کرنا بھی ان کی اولین ترجیح ہے اور اساتذہ کی کمی پوری کرنے بشمول ان کو دور جدید کےتقاضوں سے ہم آہنگ تربیت کی فراہمی کے لیے بھی اقدامات کئے جائیں گے۔

میرٹ و شفافیت پر کوئی سمجھوتہ نہیں ہوگا۔ اور اساتذہ کی بھرتیوں، تبادلوں اور تعیناتیوں بشمول تمام نظام میرٹ بیسڈ ہوگا اور محکمہ تعلیم و زیلی اداروں میں ڈیجیٹائزیشن کا عمل متعارف کروایا جائے گا۔ انہوں کہا کہ صوبے کے تمام تعلیمی بورڈز میں طلباء و طالبات کو سہولیات کی فراہمی کے لئے اصلاحات متعارف کروائے جائیں گے اور ایس ایل او بیسڈ امتحانات کے انعقاد کو صوبے کے تمام بورڈز تک توسیع دینے کے ساتھ ساتھ میرٹ پر امتحانی عملے کی تعیناتی بذریعہ ڈرا کی جائے گی۔