آئیسکو اور نادرا ٹیکنالوجیز لمیٹڈ کے درمیان معاہدے پر دستخط

جمعہ 3 اکتوبر 2025 21:40

اسلام آباد (اُردو پوائنٹ اخبارتازہ ترین - این این آئی۔ 03 اکتوبر2025ء)حکومت پاکستان اور وزارت توانائی کے پاور سیکٹر میں ڈیجیٹلائزیشن اور کسٹمر فرینڈلی پالیسیوں کے احکامات پر عمل کرتے ہوئے چیف ایگزیکٹیو آئیسکو انجینئر چوہدری خالد محمود نے سی ای او نادرا ٹیکنالوجیز لمیٹڈ عمر خان آزاد کے ساتھ ایک معاہدے پر دستخط کئے ہیں۔ترجمان آئیسکو کے مطابق معاہدے کے تحت اب مستقبل میں بجلی کے نئے کنکشنز اور ری کنکشنز کیلئے صارف کی بائیو میٹرک تصدیق کو یقینی بنایا جائے گا، اس اقدام سے جعلی اور غیر قانونی بجلی کنکشنز کا خاتمہ ممکن ہو گا، آئیسکو کو صارفین کی درست معلومات دستیاب ہوں گی، مزید آئیسکو نادہندگان واجبات کی ادائیگی کے بغیر بجلی کا نیا کنکشن حاصل نہیں کر سکیں گے۔

انجینئر چوہدری خالد محمود کے مطابق جدید ٹیکنالوجی سے استفادہ دور حاضر کی اہم ترین ضرورت ہے اور آئیسکو جدید ٹیکنالوجی کا استعمال کرتے ہوئے نہ صرف پاور ڈسٹری بیوشن سسٹم کو مستحکم کر رہا ہے بلکہ بہترین کسٹمر سروسز اور شفافیت کی جانب گامزن ہے اور آج کا یہ معاہدہ اسی سلسلے کی ایک کڑی ہے۔

(جاری ہے)

سی ای او نادرا ٹیکنالوجیز لمیٹڈ عمر آزاد خان نے کہا کہ آئیسکو کے لئے ہماری سروسز ہمیشہ دستیاب ہیں کیونکہ دونوں اداروں کی سمت خوشحال پاکستان اور مطمئن صارف ہے۔ اس موقع پر آئیسکو اور نادرا ٹیکنالوجیز لمیٹڈ کے سینئر افسران بھی موجود تھے۔