اے این ایف کے ملک کے مختلف شہروں میں منشیات فروشوں کے خلاف 6 آپریشنز ‘ 84 لاکھ کی 83 کلوگرام منشیات برآمد‘ 4 ملزمان گرفتار

پیر 6 اکتوبر 2025 22:01

راولپنڈی (اُردو پوائنٹ اخبارتازہ ترین - آن لائن۔ 06 اکتوبر2025ء) انسداد منشیات فورس (اے این ایف) نے ملک کے مختلف شہروں میں منشیات فروشوں کے خلاف 6 آپریشنز کے دوران 84 لاکھ روپے سے زائد مالیت کی 83 کلوگرام منشیات برآمد کر کے 4 ملزمان گرفتار کر لئے اے این ایف سے جاری تفصیلات کے مطابق اسلام آباد موٹر وے ٹول پلازہ کے قریب گاڑی سے 300 گرام آئس برآمد کر کے ایک ملزم کو گرفتار کیا گیا گرفتار ملزم نے طلباء کو منشیات فروخت کرنے کا اعتراف کیا ملتان میں واقع ایک کوریئر آفس میں سکاٹ لینڈ سے آنے والے کریم کے ڈبوں کے پارسل میں چھپائی گئی 120 گرام کوکین برآمد کی گئی پشین کوئٹہ میں ہوٹل کے قریب گاڑی سے 65 کلوگرام چرس برآمد کرنے کے علاوہ اٹک کے قطبال ٹول پلازہ پر گاڑی سے 9 اعشاریہ 6 کلوگرام چرس برآمد کر کے ایک ملزم کو گرفتار کیا گیا اسی طرح رنگ روڈ پشاور کے قریب موٹر سائیکل سوار کے قبضے سے 6 کلوگرام افیون برآمد اور راولپنڈی کے ایک کوریئر آفس میں پشاور سے آئے کریم کے ڈبوں کے پارسل میں چھپائی گئی 2 اعشاریہ 3 کلوگرام افیون بھی برآمد کر لی گئی ترجمان اے این ایف کے مطابق تمام ملزمان کے خلاف انسدادِ منشیات ایکٹ 1997 کے تحت مقدمات درج کر لئے گئے ہیں۔