پنجاب حکومت نے مزید 17 اضلاع میں کنزیومر پروٹیکشن کونسلز قائم کر دیں ،دائرہ کار35 اضلاع تک بڑھ گیا

کنزیومر پروٹیکشن کونسلز کے قیام سے عوامی شکایات کے ازالے کا نظام مزید موثر ہوگا‘ سیکرٹری پرائس کنٹرول کرن خورشید

جمعہ 10 اکتوبر 2025 11:35

لاہور(اُردو پوائنٹ اخبارتازہ ترین - این این آئی۔ 10 اکتوبر2025ء) پنجاب حکومت نے صارفین کے حقوق کے تحفظ کیلئے مزید 17 اضلاع میں کنزیومر پروٹیکشن کونسلز قائم کر دیں جس کے بعد اس کا دائرہ کار35 اضلاع تک بڑھ گیا۔گورنر پنجاب نے پنجاب کنزیومر پروٹیکشن ایکٹ 2005 کے تحت کونسلز کے قیام کی منظوری دی۔ سیکرٹری پرائس کنٹرول ڈاکٹر کرن خورشید کے مطابق اشیا ء کے معیار کے ساتھ ساتھ اب سروسز فراہمی میں دشواری بارے شکایات کا اندراج کروایا جاسکے گا، صارفین کو فوری اور موثر انصاف کی فراہمی حکومت کی اولین ترجیح ہے۔

سیکرٹری پرائس کنٹرول کے مطابق عوامی شکایات کے بروقت ازالے کے لئے متعلقہ ڈپٹی کمشنر دفتر میں ہی کونسل موجود ہوگی، راولپنڈی، لاہور، فیصل آباد، سیالکوٹ اور گوجرانوالہ ،نئی کونسلز میں اٹک، جہلم، نارووال، چنیوٹ، قصور، خوشاب، ٹوبہ ٹیک سنگھ، اوکاڑہ اور خانیوال ،لودھراں، مظفرگڑھ، حافظ آباد، جھنگ، پاکپتن، راجن پور، شیخوپورہ اور وہاڑی میں قائم کی گئی ہیں،کنزیومر پروٹیکشن کونسلز کے قیام سے عوامی شکایات کے ازالے کا نظام مزید موثر ہوگا۔

(جاری ہے)

انہوں نے کہا کہ صارفین کے حقوق کے تحفظ کے حوالے سے یہ اقدام صوبائی سطح پر سنگِ میل ثابت ہو گا، کنزیومر پروٹیکشن کونسل کی ہیلپ لائن اور ایپلی کیشن کا جلد اجرا کیا جائے گا۔ڈائریکٹر کنزیومر پروٹیکشن کونسل عمران قریشی نے محکمانہ استعداد کار میں اضافے کی بھی ہدایت کر دی ۔