چین کا امریکی بحری جہازوں پر خصوصی پورٹ فیس عائد کرنے کا اعلان،14 اکتوبر سے نافذالعمل ہو گا

جمعہ 10 اکتوبر 2025 17:51

بیجنگ (اُردو پوائنٹ اخبارتازہ ترین - اے پی پی۔ 10 اکتوبر2025ء) چین نےامریکی کمپنیوں، تنظیموں اور افراد کے زیرِ ملکیت یا آپریٹ کردہ بحری جہازوں پر خصوصی پورٹ فیس عائد کرنے کا اعلان کیا ہے جس کا نفاذ 14 اکتوبر سے ہو گا۔ شنہوا کے مطابق اس بات کا اعلان چین کی وزارت ٹرانسپورٹ نے جمعہ کو کیا ۔ وزارت نے کہا ہے کہ یہ اقدام امریکا کی جانب سے ’’سیکشن 301‘‘ تحقیقات کے بعد چینی جہازوں پر اضافی پورٹ فیس نافذ کرنے کے فیصلے کے ردعمل میں اٹھایا گیا ہے جو آئندہ منگل سے مؤثر ہوگا۔

چینی وزارتِ ٹرانسپورٹ نے مزید واضح کیا کہ جن جہازوں پر یہ فیس لاگو ہوگی، ان میں وہ بحری جہاز بھی شامل ہیں جو امریکی کمپنیوں، تنظیموں یا افراد کے زیر ملکیت یا آپریٹ کیے جا رہے ہوں جن اداروں میں امریکی مفاد (براہِ راست یا بلاواسطہ) 25 فیصد یا اس سے زیادہ ہو اور وہ تمام بحری جہاز جو امریکی ہوں یا امریکا میں تیار کیے گئے ہوں۔

(جاری ہے)

وزارت نے اعلان کیا کہ یہ خصوصی فیس مرحلہ وار عائد کی جائے گی۔

پہلے مرحلے میں 14 اکتوبر سے ایسے تمام امریکی بحری جہازوں کے لیے فیس 400 یوان فی نیٹ ٹن (تقریباً 56.3 امریکی ڈالر) مقرر کی گئی ہے۔ یہ فیس آئندہ تین سالوں تک ہر سال 17 اپریل کو بتدریج بڑھائی جائے گی۔ وزارت نے اس فیصلے کو چینی بحری کمپنیوں کے قانونی حقوق و مفادات کے تحفظ کے لئے جائز اقدام قرار دیا ہے۔ بیان میں مزید کہا گیا کہ امریکی اقدامات بین الاقوامی تجارتی اصولوں اور چین۔امریکا بحری نقل و حمل کے معاہدے کی سنگین خلاف ورزی ہیں، جن سے دونوں ممالک کے درمیان بحری تجارت کو شدید نقصان پہنچا ہے۔ چینی وزارت نے امریکا پر زور دیا کہ وہ فوری طور پر اپنی غلط پالیسیوں کی اصلاح کرے اور چین کی بحری صنعت کو بلاجواز دبانے کا سلسلہ بند کرے۔

متعلقہ عنوان :