دشمن جانتا ہے کہ حملہ کیا تو جنگ بندی کے لئے گڑگڑانا پڑے گا، ایران

ایران اسلامی انقلاب سے آج تک دشمنوں کی سازشوں کا سامنا کرتا رہا ہے،نائب صدر

جمعہ 10 اکتوبر 2025 17:15

دشمن جانتا ہے کہ حملہ کیا تو جنگ بندی کے لئے گڑگڑانا پڑے گا، ایران

تہران(اُردو پوائنٹ اخبارتازہ ترین - این این آئی۔ 10 اکتوبر2025ء) ایران کے نائب صدر محمد رضا عارف نے کہا ہے کہ ایران کے خلاف ہر جارحانہ اقدام نے قوم کو مزید متحد اور اسلامی نظام کی بنیادوں کو مزید مستحکم کردیا ہے۔غیر ملکی ذرائع ابلاغ کے مطابق ایران کے نائب صدر محمد رضا عارف کا اپنے بیان میں کہنا تھا کہ صہیونی حکومت اور امریکہ کی جانب سے مسلط کردہ حالیہ جنگ دشمنوں کی ناکامی اور رسوائی کا باعث بنی۔

(جاری ہے)

نائب صدر نے کہا کہ ایران 1979 کے اسلامی انقلاب سے لے کر آج تک دشمنوں کی سازشوں کا سامنا کرتا رہا ہے، مگر ہر حملے نے قوم کو مزید متحد کیا ہے۔محمدرضا عارف نے انکشاف کیا کہ اقوام متحدہ کے سیکریٹری جنرل انٹونیو گوٹریش نے بھی تسلیم کیا کہ 12 روزہ تصادم نے ایران کی حکومت کو گرانے کی تمام کوششوں کا باب بند کر دیا ہے۔انہوں نے واضح کیا کہ ہم جنگ کے خواہاں نہیں، مگر اگر دشمن حملہ کرے تو ایسا جواب دیا جائے گا جس سے اسے ہی جنگ بندی کے لئے گڑگڑانا پڑے گا۔