لیسکوکا گلبرگ ڈویژن میں بجلی چوروں کیخلاف کریک ڈائون ،متعدد گھروں سے بجلی چوری پکڑی گئی

ہفتہ 11 اکتوبر 2025 23:15

لاہور (اُردو پوائنٹ اخبارتازہ ترین - اے پی پی۔ 11 اکتوبر2025ء) لاہور الیکٹرک سپلائی کمپنی (لیسکو) نے بجلی چوروں کے خلاف اپنی کارروائیوں کو مزید تیز کر دیا ہے، چیف ایگزیکٹو آفیسر لیسکو انجینئر محمد رمضان بٹ کی ہدایات پر گلبرگ ڈویژن میں بجلی چوروں کے خلاف بڑا کریک ڈائون کیا اور متعدد گھروں سے بجلی چوری پکڑی گئی۔ترجمان لیسکو کے مطابق ایکسئین گلبرگ اور ایس ڈی او لبرٹی سب ڈویژن طاہر ستار کی سربراہی میں پولیس کی مدد سے گلبرگ میں بجلی چوروں کے خلاف کارروائی کی گئی۔

اس دوران 116 ایف ون گلبرگ میں ایک گھر کے اندر خفیہ طور پر لگائے گئے کرشنگ یونٹ پر ڈائریکٹ سپلائی سے بجلی کی چوری پکڑی گئی۔ صارف ڈائریکٹ کنکشن لگا کر بجلی چوری کر رہا تھا، جب اسے دروازہ کھولنے کا کہا تو اس نے انکار کر دیا،جس پر لیسکو ٹیم ایس ڈی او طاہر ستار کی قیادت میں پولیس کے ہمراہ گیٹ پھلانگ کر گھر میں داخل ہوئی اور موقع پر دو بجلی چوروں کو گرفتار کر لیا ، خفیہ کرشنگ یونٹ سے 500 سے زائد چینی کی بوریاں بھی برآمد ہوئیں۔

(جاری ہے)

ملزمان کے خلاف مقدمہ درج کرنے کے لیے متعلقہ تھانے میں درخواست دے دی گئی ہے۔چیف ایگزیکٹو لیسکو انجینئر محمد رمضان بٹ کاکہنا ہے کہ بجلی چور قوم کے دشمن ہیں، ان کے خلاف کارروائیاں جاری رہیں گی تاکہ قومی وسائل کا تحفظ یقینی بنایا جا سکے۔انہوں نے عوام سے اپیل کی کہ وہ بجلی چوری روکنے میں لیسکو کا ساتھ اور مشکوک سرگرمیوں کی اطلاع ہیلپ لائن 118 پر دیں۔