علیمہ خان کے عدالت میں پیش ہونے پر وارنٹ گرفتاری منسوخ، فرد جرم کیلئے تاریخ مقرر

ہفتہ 11 اکتوبر 2025 23:08

راولپنڈی (اُردو پوائنٹ اخبارتازہ ترین - این این آئی۔ 11 اکتوبر2025ء) علیمہ خان کے عدالت میں پیش ہونے پر وارنٹ گرفتاری منسوخ کردیے گئے جب کہ ان پر فرد جرم عائد کرنے کی تاریخ مقرر کردی گئی۔ ہفتے کو انسداد دہشت گردی عدالت میںجج امجد علی شاہ نے 26نومبر احتجاج کیس پر سماعت کی علیمہ خان عدالت میں پیش ہوئیں جس پر عدالت نے ان کے وارنٹ گرفتاری منسوخ کردیے۔

(جاری ہے)

دورانِ سماعت صادق آباد احتجاج کیس میں علیمہ خان پر فرد جرم عائد نہیں ہو سکی۔ انہوں نے موقف اختیار کیا کہ میرے وکیل موجود نہیں ہیں، لہٰذا کارروائی موخر کی جائے ۔بعد ازاں انسداد دہشت گردی عدالت کے جج امجد علی شاہ نے وکیل نہ ہونے پر سماعت بغیر کارروائی پیر 13 اکتوبر تک ملتوی کر دی اور 2 غیر حاضر ملزمان عاطف ریاض اور اکرام کے وارنٹ گرفتاری جاری کردیے۔عدالت نے علیمہ خان پر فرد جرم کے لیے 13 اکتوبر کی تاریخ مقرر کرتے ہوئے ملزمہ کو آئندہ سماعت پر حاضر ہونے کا حکم دیا ہے۔