یونیسکو نے پاکستان کی تجویز برائے انسدادِ غلط و گمراہ کن معلومات اور نفرت انگیز تقاریر کو منظور کر لیا

اتوار 12 اکتوبر 2025 11:40

پیرس (اُردو پوائنٹ اخبارتازہ ترین - اے پی پی۔ 12 اکتوبر2025ء) یونیسکو نے غلط اور گمراہ کن معلومات اور نفرت انگیز تقاریر کے تدارک کے ذریعے اظہارِ رائے کی آزادی کے تحفظ اور ڈیجیٹل دور میں معلومات کی سچائی کو یقینی بنانے سے متعلق پاکستان کی پیش کردہ تجویز کو منظور کر لیا ہے ۔پیرس میں پاکستانی سفارتخانہ کی جانب سے جاری پریس ریلیز کے مطابق یہ تجویز پاکستان کی مستقل مندوب برائے یونیسکو سفیر ممتاز زہرا بلوچ نے پیرس میں جاری یونیسکو کے ایگزیکٹو بورڈ کے 222ویں اجلاس میں پیش کی ۔

پاکستان کی تجویز کو رکن ممالک کی جانب سے وسیع سطح پر حمایت حاصل ہوئی جو اس بات کا مظہر ہے کہ عالمی برادری ڈیجیٹل دور میں معلومات کی درستگی اور شفافیت کے تحفظ کے لیے پرعزم ہے۔ یہ تجویز یونیسکو کے اس کردار کو مزید مضبوط کرتی ہے جو ایک محفوظ، قابلِ اعتماد اور جامع معلوماتی ماحول کے فروغ کے لیے انسانی حقوق، جمہوری اقدار اور معلومات تک مساوی رسائی کے اصولوں کی بنیاد پر کام کر رہا ہے۔

(جاری ہے)

یونیسکو کے ایگزیکٹو بورڈ نے اس بات پر زور دیا کہ نئی ابھرتی ہوئی ٹیکنالوجیز جیسے مصنوعی ذہانت (AI)، نیورو ٹیکنالوجی اور ورچوئل ڈیجیٹل ماحول، معلومات کی درستگی کے لیے نئے چیلنجز پیدا کر رہی ہیں۔ بورڈ نے ڈیجیٹل پلیٹ فارمز پر زور دیا کہ وہ شفافیت اور جوابدہی کو یقینی بنائیں، اے آئی سے تیار کردہ یا تبدیل شدہ مواد کو واضح طور پر شناخت کریں اور توثیقی نظام کو مزید مؤثر بنائیں۔