راولپنڈی پولیس اور ملزمان کے درمیان فائرنگ کے تبادلے میں ڈکیت اور کار لفٹر علی شان ہلاک

اتوار 12 اکتوبر 2025 12:50

راولپنڈی (اُردو پوائنٹ اخبارتازہ ترین - اے پی پی۔ 12 اکتوبر2025ء) راولپنڈی کے تھانہ دھمیال کے علاقے میں رات گئے پولیس اور خطرناک ملزمان کے درمیان فائرنگ کا تبادلہ ہوا جس کے نتیجے میں انتہائی مطلوب ڈکیت اور کار لفٹر علی شان ہلاک ہو گیا۔ پولیس کے مطابق ہلاک ہونے والا ملزم علی شان ڈکیتی، قتل اور گاڑی چوری کے درجنوں مقدمات میں ملوث اور مطلوب تھا۔

ملزم نے سال 2023 میں ڈکیتی کے دوران فائرنگ کر کے ایک شہری کو قتل بھی کیا تھا۔

(جاری ہے)

ترجمان راولپنڈی پولیس کے مطابق علی شان کو گزشتہ روز مسروقہ کار کی برآمدگی کے لیے لے جایا جا رہا تھا کہ اسی دوران اس کے ساتھیوں نے پولیس پارٹی پر فائرنگ کر کے اسے حراست سے فرار کروا لیا۔ پولیس کو جب ملزمان کی دوبارہ موجودگی کی اطلاع ملی تو ریڈ کیا گیا جس پر ملزمان نے پولیس پر فائرنگ کر دی۔ پولیس کی جوابی کارروائی میں علی شان ہلاک ہو گیا جبکہ اس کے ساتھی موقع سے فرار ہو گئے۔ سی پی او سید خالد ہمدانی نے فائرنگ کے باوجود بہادری سے فرائض انجام دینے پر پولیس ٹیم کو شاباش دی۔ انہوں نے کہا کہ شہریوں کے جان و مال کے دشمن اور پولیس پر حملہ کرنے والے قانون کی گرفت سے نہیں بچ سکتے۔