فیصل آباد پولیس نے رواں سال سٹریٹ کرائم اور سنگین مقدمات کے 11000سے زائد ملزمان گرفتار کئے، ترجمان پولیس

پیر 13 اکتوبر 2025 17:34

فیصل آباد (اُردو پوائنٹ اخبارتازہ ترین - اے پی پی۔ 13 اکتوبر2025ء) فیصل آباد پولیس نے رواں سال سٹریٹ کرائم اور سنگین مقدمات کے 11000سے زائد ملزمان گرفتار کئے ہیں۔ ترجمان پولیس طارق جٹ نے بتایا کہ سٹی پولیس آفیسر صاحبزادہ بلال عمر کی زیر قیادت رواں سال فیصل آباد پولیس نے بہترین کارکردگی کا مظاہرہ کیا۔فیصل آباد پولیس نے رواں سال سٹریٹ کرائم اور سنگین مقدمات کے 11000سے زائد ملزمان کو گرفتار کرلیا۔

انہوں نے بتایا کہ ضلع بھر کے تھانوں کی حدود میں کی گئی کارروائیوں میں رواں سال 274 گینگز کے 714 ملزمان کو گرفتارکر کے ان سے بھاری مقدار میں مال مسروقہ و دیگر سامان برآمد کیا۔ گینگز اور ملزمان سے 94 کروڑ 80 لاکھ سے زائد مال مسروقہ برآمد کیا گیا۔ڈکیتی معہ قتل کے 36 ملزمان گرفتار کر کے جیل بھجوایا گیا جس کی شرح چالان 92 فیصد رہی۔

(جاری ہے)

ڈکیتی کے 129ملزمان گرفتار ہوئے اور چالان کی شرح 65 فیصدرہی۔

دوران راہزنی زخمی کرنے والے 141 ملزمان گرفتار کئے گئے ، چالان کی شرح 84 فیصدرہی۔ رابری میں 7285 ملزمان گرفتار ہوئے ،چا لان کی شرح 71 فیصدرہی۔ جھپٹنے اور چھیننے کی وارداتوں میں 1019ملزمان کو گرفتار کیا گیا جن کی چالان شرح 59 فیصدرہی۔ اسی طرح نقب زنی کے 1489مویشی چوری کے934ملزمان کو گرفتار کر کے جیل بھجوایا گیا۔ انہوں نے بتایا سی پی او کی ہدایات پر گشت اورناکہ بندیوں کومزید مؤثر بنایا جا رہا ہےاور جرائم پیشہ عناصر کے خلاف بلاتفریق کارروائیاں جاری ہیں۔