محکمہ زراعت کا زیادہ سے زیادہ رقبہ پر گندم کی شاندار فصل کی کاشت کیلئے فارمرز ڈیز کے انعقاد کااعلان

پیر 13 اکتوبر 2025 22:37

فیصل آباد (اُردو پوائنٹ اخبارتازہ ترین - اے پی پی۔ 13 اکتوبر2025ء) محکمہ زراعت نے زیادہ سے زیادہ رقبہ پر گندم کی شاندار فصل کی کاشت کیلئے فارمرز ڈیز کے انعقاد کااعلان کیاہے ،جس میں کاشتکاروں کوجدید ٹیکنالوجی سے آگاہی فراہم کی جائے گی جبکہ حکومت پنجاب نے محکمہ زراعت کو گندم کی بمپر کراپ کے حصول کیلئے تمام وسائل بروئے کار لانے کی ہدایت کی ہے اور کہا ہے کہ محکمہ زراعت کے افسران و اہلکاران کاشتکاروں کو جدید ٹیکنالوجی سے استفادہ کر نے کی ترغیب دیں تاکہ گندم کی فی ایکڑ زیادہ پیداوار کے حصول سمیت آئندہ سال کیلئے مقرر کردہ گندم کے پیداواری اہداف کا حصول ممکن بنایا جا سکے۔

نظامت زرعی اطلاعات محکمہ زراعت کے مطابق وطن عزیز کی روز افزوں بڑھتی ہوئی آبادی کے پیش نظر غذائی پیداوار میں خاطر خواہ اضافہ وقت کی اہم ترین ضرورت ہے تاکہ ہم اپنی غذائی ضروریات میں خود کفیل ہو سکیں اور اضافی گندم برآمد کر کے ملک کو قیمتی زر مبادلہ کمانے کے قابل بھی بنایا جا سکے۔

(جاری ہے)

انہوں نے کہا کہ حکومت محکمہ زراعت کو تمام وسائل فراہم کر رہی ہے لہذا وہ بھی کاشتکاروں کو تمام سہولیات کی بہم رسانی یقینی بنا رہے ہیں۔

انہوں نے کہا کہ کاشتکاروں کو گندم کی فی ایکڑ پیداوار بڑھانے کیلئے جدید ٹیکنالوجی سے روشناس کروانے کی غرض سے گاؤں اور تحصیل مراکز کی سطح پر فارمرز ڈیز کا بھی انعقاد کیا جائے گا۔انہوں نے کہا کہ اگر کسی جگہ پر مطلوبہ کھادوں کی دستیابی میں کمی کی کوئی شکایت ہو تو فوری طور پر متعلقہ ضلع کے ڈی او زراعت اور ڈی سیز سے رابطہ کیا جا سکتا ہے۔ انہوں نے گندم کے کاشتکاروں کو بھی ہدایت کی کہ وہ محکمہ زراعت کے مشوروں کے مطابق جدید ٹیکنالوجی سے استفادہ کریں تاکہ پاکستان کو غذائی خود کفالت سے ہمکنار کرنے کے ساتھ ساتھ اضافی گندم برآمد کر کے قیمتی زر مبادلہ بھی کمایا جا سکے۔