Live Updates

پاک فوج نےطالبان اور فتنہ الخوارج کے خلاف شدید جوابی کارروائیاں کرتے ہوئے6 ٹینک بمعہ عملہ اور پانچ ٹینک پوزیشن تباہ کر دیں

بدھ 15 اکتوبر 2025 01:40

راولپنڈی (اُردو پوائنٹ اخبارتازہ ترین - اے پی پی۔ 15 اکتوبر2025ء) پاک فوج نےطالبان اور فتنہ الخوارج کے خلاف شدید جوابی کارروائیاں کرتے ہوئے6 ٹینک بمعہ عملہ اور پانچ ٹینک پوزیشن تباہ کر دی ہیں ۔فتنہ الخوارج کے ایک اہم کمانڈر کی ہلاکت کی اطلاعات ہیں۔ فتنہ الخوارج اور طالبان کے کارندے اپنی متعدد لاشیں اور پوسٹیں چھوڑ کر فرار ہوگئے۔طالبان نے ایک چیک پوسٹ پر سفید جھنڈا لہرادیا۔

پولسین پوسٹ کے مد مقابل فتنہ الخوارج کا ٹریننگ کیمپ مکمل طور پر تباہ ہو گیا۔ سکیورٹی ذرائع کے مطابق کُرم میں افغان طالبان اور فتنہ الخوارج نے بلا اشتعال فائرنگ کی۔پاک فوج کی جانب سے بھرپور اور شدید جواب دیاگیا ،پاک فوج کی فائرنگ کی وجہ سے طالبان پوسٹوں کا شدید نقصان ہوا۔ افغان طالبان کی پوسٹوں پر آگ بھڑک اٹھی،طالبان کا ٹینک بھی تباہ ہوگیا اور پوسٹیں چھوڑ کر فرارہوگئے،کرم سیکٹر میں افغان طالبان کی ایک اور پوسٹ اور ٹینک پوزیشن تباہ ہوگئی۔

(جاری ہے)

طالبان اپنی متعدد لاشیں پوسٹ پر چھوڑ کر فرار ہوگئے۔سکیورٹی ذرائع کے مطابق پاک فوج کی کرم سیکٹر میں ایک اور کارروائی میں انتہائی مہارت اور پیشہ ورانہ کارروائی کے دوران طالبان کے چلتے ٹینک کو نشانہ بنا کے تباہ کیا گیا،تباہ کیے گئے ٹینک کی فوٹیج دیکھی جا سکتی ہے۔پاک فوج نےخوست، افغانستان میں پانچویں ٹینک پوزیشن نارگسرپوسٹ پر کھڑے ٹینک اور اسکے کریو کو بھی تباہ کر دیا ،طالبان اور فتنہ الخوارج کے متعدد کارندے ٹینک میں ہلاک اور پوسٹیں خالی ہوگئیں۔

ترکمان زئی ٹاپ پر پاک فوج نے کارروائی کرتے ہوئے چھٹا ٹینک بمع عملہ تباہ کر دیا، اینڈ وی ڈی سے تباہ شدہ ٹینک سے آگ کے شعلے بلند ہوتے نظر آرہے ہیں ، قابض طالبان جتھے کے کارندے اپنی پوسٹیں چھوڑ کر بھگوڑے ہوگئے۔پاکستانی فورسز کی شدید جوابی کارروائی کے جواب میں طالبان کارندوں نے اپنی ایک بارڈر پوسٹ پر سفید جھنڈا لہرا دیا،سفید جھنڈالہرانے کے بعد طالبان ریجیم کے کارندے پوسٹ خالی چھوڑ کر فرار ہو گئے۔ پاک فوج نے پولسین پوسٹ کے مد مقابل خارجی ملک نعیم کے ٹریننگ کیمپ کو بھی نشانہ بنایا۔کارروائی کے دوران فتنہ الخوارج کا ٹریننگ کیمپ مکمل طور پر تباہ ہو گیا۔