فیصل آباد، کرایہ داری ایکٹ کی خلاف ورزی پر رواں سال 1965 ملزمان گرفتار

بدھ 15 اکتوبر 2025 14:59

فیصل آباد (اُردو پوائنٹ اخبارتازہ ترین - اے پی پی۔ 15 اکتوبر2025ء) فیصل آباد پولیس نے رواں سال کرایہ داری ایکٹ کی خلاف ورزی پر 1965 ملزمان کو گرفتار کرکے مقدمات درج کئے۔ ترجمان پولیس طارق جٹ نے بتایا ہےکہ رواں سال کرایہ داری ایکٹ کی خلاف ورزی پر 1965 ملزمان کو گرفتار کر کے مقدمات کا اندراج کیا گیاہے۔ گزشتہ سال صرف 191ملزمان کو گرفتار کر کے مقدمات کا اندراج کیاگیا تھا۔

رواں سال 1774 کارروائیاں کی گئیں۔ ترجمان نے بتایا کہ سی پی او فیصل آباد صاحبزادہ بلال عمرنے اس حوالے سے کہا کہ کرایہ داری ایکٹ کے تحت کرایہ داروں کا اندراج نہ کروانے والے پراپرٹی مالکان کے خلاف بھی کارروائی ہوگی۔ پولیس ٹیننٹ رجسٹریشن سسٹم میں اندراج مالک مکان اور کرایہ دار دونوں کی ذمہ داری ہے۔

(جاری ہے)

ٹیننٹ رجسٹریشن سسٹم کے تحت کوائف اندراج سے اشتہاریوں اور جرائم پیشہ عناصرکے خلاف گھیرا تنگ کیا جارہا ہے۔

انہوں نے ہدایات جاری کرتے ہوئے کہا کہ ایس ایچ اوز اپنے علاقے میں کرایہ داروں کے اندراج کے لئے پراپرٹی مالکان کے ذریعے پولیس ایپ ”ٹیننٹ رجسٹریشن“میں اندراج یقینی بنائیں۔ پولیس سافٹ ویئرز کی مدد سے جرائم پیشہ افراد کو قانون کی گرفت میں لایاجا رہا ہے۔ذمہ دارشہری ہونے کاثبوت دیں اورکرایہ داری ایکٹ کی بابت اندراج یقینی بنائیں۔