کمشنر گوجرانوالہ ڈویژن کا گورنمنٹ علامہ اقبال میموریل ٹیچنگ ہسپتال سیالکوٹ کا اچانک دورہ

بدھ 15 اکتوبر 2025 16:52

سیالکوٹ (اُردو پوائنٹ اخبارتازہ ترین - اے پی پی۔ 15 اکتوبر2025ء) کمشنر گوجرانوالہ ڈویژن سید نوید حیدر شیرازی نے گورنمنٹ علامہ اقبال میموریل ٹیچنگ ہسپتال سیالکوٹ کا اچانک دورہ کیا۔ اس موقع پر ڈپٹی کمشنر سیالکوٹ صبا اصغر علی، ایڈیشنل ڈپٹی کمشنر ریونیو عباس ذوالقرنین اور ایم ایس ڈاکٹر سہیل انجم بٹ بھی ان کے ہمراہ موجود تھے۔کمشنر نےہسپتال کی او پی ڈی، ٹراما سینٹر، ریڈیالوجی ڈیپارٹمنٹ اور مختلف وارڈز کا تفصیلی معائنہ کیا۔

انہوں نے مریضوں کی عیادت کی اور ان سے میڈیکل سہولیات، ادویات کی دستیابی اور عملے کے رویے کے بارے میں دریافت کیا۔ اس موقع پر سید نوید حیدر شیرازی نے ہسپتال انتظامیہ کو ہدایت کرتے ہوئے کہا کہ ہسپتال میں آنے والے مریضوں سے خوش اخلاقی سے پیش آیا جائے،انہیں علاج معالجے کی معیاری اور بروقت سہولیات فراہم کی جائیں۔

(جاری ہے)

انہوں نے مزید کہا کہ حکومت پنجاب صوبے بھر میں صحت عامہ کے نظام کی بہتری کے لیے عملی اقدامات کر رہی ہے تاکہ مریضوں کو ہسپتالوں میں معیاری علاج، دوائیں اور بہتر سہولیات میسر آ سکیں۔

بعد ازاں، کمشنر گوجرانوالہ نے اسپیشلائزڈ ہیلتھ کیئر اینڈ میڈیکل ایجوکیشن ڈیپارٹمنٹ کی زیر نگرانی قائم کیے جانے والے 500 بیڈز پر مشتمل ہسپتال کی نئی عمارت کے مجوزہ اراضی کا بھی معائنہ کیا۔ یاد رہے یہ منصوبہ 2024-25 کے سالانہ ترقیاتی منصوبوں کا حصہ ہے اور پی سی ون تکمیل کے مراحل میں ہے ۔ اس منصوبے کی تکمیل کا تخمینہ 7 ارب روپے لگایا گیا ہے۔