پر تشدد احتجاج ،تحریک لبیک کے منتظمین کی نشاندہی، مشتعل عناصر کی فہرست تیارکر لی گئی

بدھ 15 اکتوبر 2025 23:27

لاہور(اُردو پوائنٹ اخبارتازہ ترین - این این آئی۔ 15 اکتوبر2025ء) تحریک لبیک کے پرتشدد احتجاج کے منتظمین کی نشاندہی کرنے کے بعد تمام مشتعل عناصر کی فہرست تیار کر لی گئی۔پولیس ذرائع کے مطابق قانون نافذ کرنے والے اداروں کو مکمل ڈیٹا فراہم کر دیا گیا، ملک گیر نیٹ ورک اور کمانڈ پوائنٹس کی نشاندہی مکمل کر لی گئی، جیو فینسنگ سے مرکزی کردار سامنے آگئے جبکہ کال ڈیٹا ریکارڈ سے ماسٹر مائنڈز کی شناخت بھی ہوگئی ہے، فنانسرز اور سہولت کاروں کو علیحدہ کر لیا گیا۔

(جاری ہے)

ذرائع کے مطابق قانون نافذ کرنے والے اداروں کی جانب سے وارنٹس تیار کر لئے گئے اور کسی بھی وقت کریک ڈائون متوقع ہے، بڑے شہروں میں چھاپوں کی منصوبہ بندی بھی مکمل کر لی گئی ہے۔پولیس ذرائع کے مطابق املاک جلانے والوں کی ویڈیوز اور چہرے شناخت ہوگئے، فیشل ریکگنیشن سے تمام کردار بھی بے نقاب ہوگئے، مشتبہ فنڈنگ کی مکمل چھان بین جاری ہے، بینکاری ریکارڈ محفوظ ہے اور خصوصی ٹیمیں متحرک ہیں۔پولیس ذرائع کے مطابق امن خراب کرنے والوں کے خلاف زیرو ٹالرنس پالیسی ہے اور قانون کے مطابق سخت کارروائی یقینی بنائی جائے گی۔