آل جموں و کشمیر مسلم کانفرنس کے 93ویں یومِ تاسیس کی تقریبات کا باضابطہ آغاز کر دیا گیا

بدھ 15 اکتوبر 2025 23:10

مظفرآباد /میرپور /راولاکوٹ/باغ/بھمبر /سماہنی /جہلم ویلی/نیلم ویلی /دھیرکوٹ/مظفرآباد (این این آئی) آل جموں و کشمیر مسلم کانفرنس کے 93ویں یومِ تاسیس کی تقریبات کا باضابطہ آغاز کر دیا گیا۔ ہر سال کی طرح اس سال بھی جماعت کے زیر اہتمام 15 اور 16 اکتوبر کو پورے آزاد کشمیر سمیت مقبوضہ جموں و کشمیر اور بیرونِ ملک شایانِ شان طریقے سے یہ دن منایا جائے۔

صدر جماعت و سابق وزیراعظم آزاد جموں و کشمیر سردار عتیق احمد خان کی خصوصی ہدایت پر یومِ تاسیس کے سلسلے میں مرکزی، ضلعی، تحصیلی اور وارڈ سطح پر تقریبات، جلسے، سیمینارز اور دعائیہ اجتماعات کا انعقاد کیا جا رہا ہے۔ ان تقریبات کا مقصد جماعت کی تاریخی جدوجہد کو اجاگر کرنا، بانیانِ مسلم کانفرنس کو خراجِ عقیدت پیش کرنا اور تحریکِ آزادی کشمیر کے ساتھ تجدیدِ عہد کرنا ہے۔

(جاری ہے)

اس موقع پر جماعت کے مرکزی و ضلعی رہنما، سابق وزراء، معززینِ شہر اور کارکنان کی بڑی تعداد شرکت کرے گی۔جماعت کے رہنماؤں نے اس موقع پر کہا کہ مسلم کانفرنس ریاستِ جموں و کشمیر کی پہلی اور نظریاتی بنیادوں پر قائم سیاسی جماعت ہے جس نے عوامی شعور بیدار کیا، تحریکِ آزادی کو سمت دی اور ریاستی تشخص کے تحفظ کے لیے بے مثال قربانیاں دیں۔انہوں نے کہا کہ 93 برس گزرنے کے باوجود مسلم کانفرنس آج بھی اپنی اساس، نظریے اور قیادت پر فخر کرتی ہے۔ جماعت کا ہر کارکن بانیانِ تحریک کے مشن کو آگے بڑھانے کے لیے پرعزم ہے۔تمام ضلعی ہیڈکوارٹرز پر بھی یومِ تاسیس کی تقریبات منعقد کی جائیں گی جن میں قرآن خوانی، دعائیہ محافل، مشاعرے، تاریخی تصویری نمائشیں اور تقاریر شامل ہوں گی۔