مانسہرہ پولیس کا تھانہ ناران کی حدود گٹی داس و بابو سر ٹاپ میں سرچ اینڈ اسٹرائیک آپریشن

جمعرات 16 اکتوبر 2025 11:22

ایبٹ آباد (اُردو پوائنٹ اخبارتازہ ترین - اے پی پی۔ 16 اکتوبر2025ء) مانسہرہ پولیس نے سیاحتی مقامات پر امن و امان کو یقینی بنانے اور شرپسند عناصر کے خلاف بھرپور کریک ڈاؤن کے سلسلے میں تھانہ ناران کی حدود گٹی داس اور بابو سر ٹاپ میں وسیع پیمانے پر سرچ اینڈ اسٹرائیک آپریشن کا انعقاد کیا۔ مانسہرہ پولیس کے مطابق ڈی پی او شفیع اللہ گنڈا پور نے اس آپریشن کی بذات خود قیادت کی جبکہ ایس پی سی ٹی ڈی ثمینہ ظفر، ان کی ٹیم، ڈی ایس پی پارس، ایس ایچ او تھانہ ناران، مانسہرہ پولیس کی دیگر نفری، گلگت بلتستان پولیس اور جی بی سکاؤٹس بھی شریک تھے۔

ڈی پی او شفیع اللہ گنڈا پور کا کہنا تھا کہ مانسہرہ پولیس، گلگت بلتستان پولیس اور جی بی سکاؤٹس شانہ بشانہ کھڑے ہیں، امن و امان کی بحالی اور سیاحوں کے تحفظ کے لئے تمام دستیاب وسائل بروئے کار لائے جا رہے ہیں، جبکہ شرپسند عناصر کے خلاف زیرو ٹالرنس کی پالیسی پر سختی سے عمل کیا جا رہا ہے۔

(جاری ہے)

انہوں نے مزید کہا کہ سیاحوں اور مقامی آبادی کے جان و مال کا تحفظ ہماری اولین ترجیح ہے اور کسی بھی مشکوک سرگرمی یا قانون شکنی کو ہرگز برداشت نہیں کیا جائے گا۔

آپریشن کے دوران اہم مقامات، رہائشی آبادیوں، ہوٹلز، گیسٹ ہاؤسز اور سیاحتی راستوں کی تفصیلی تلاشی لی گئی جب کہ مشکوک افراد کی تصدیق اور ریکارڈ چیکنگ بھی کی گئی۔ پولیس نے مقامی کمیونٹی کے ساتھ میٹنگز منعقد کر کے انہیں سکیورٹی اقدامات سے آگاہ کیا اور سیاحوں کو محفوظ و پُرامن ماحول فراہم کرنے کے لئے پولیس کی اضافی نفری بھی تعینات کر دی گئی ہے۔

ڈی پی او مانسہرہ نے کہا کہ علاقے میں گشت کے نظام کو مزید موثر اور جدید خطوط پر استوار کیا جا رہا ہے تاکہ کسی بھی ہنگامی صورتحال میں فوری کارروائی ممکن ہو سکے۔ آخر میں ڈی پی او شفیع اللہ گنڈا پور نے کہا کہ مانسہرہ پولیس اپنی پیشہ ورانہ صلاحیتوں کے بل پر عوامی خدمت کے مشن کو جاری رکھے ہوئے ہے اور کسی بھی قیمت پر علاقے کا امن متاثر نہیں ہونے دیا جائے گا۔