اگر صدر ریٹائرمنٹ کے بعد کوئی آفس قبول کرتے ہیں تو استثنیٰ حاصل نہیں ہو گا

ہمارے ہاں رواج ہے کہ ہر وقت کوئی نہ کوئی وزیر اعظم یا صدر جیل میں ہوتا ہے، مشیر وزیراعظم رانا ثناء اللہ

بدھ 12 نومبر 2025 21:40

اسلام آباد(اُردو پوائنٹ اخبارتازہ ترین۔ 12 نومبر2025ء) وزیر اعظم کے مشیر برائے سیاسی امور، سینیٹر رانا ثناء اللہ نے کہاہے کہ اگر صدر ریٹائرمنٹ کی زندگی گزارتے ہیں تو استثنیٰ میں کیا برا ہی البتہ اگر صدر ریٹائرمنٹ کے بعد کوئی آفس قبول کرتے ہیں تو انہیں استثنیٰ حاصل نہیں ہو گا۔پارلیمنٹ ہاؤس آباد میں میڈیا سے گفتگو کرتے ہوئے انہوں نے کہا کہ آئین میں درج ہے کہ اگر کوئی آرٹیکل 6کی خلاف ورزی کرے گا تو اس کو سزا ملے گی، مشرف اور باجوہ کو کیا مسائل ہوئے ہیں مشرف کے خلاف فیصلہ آیا تو پھر اس فیصلے کا کیا ہوا ۔

رانا ثناء اللہ نے کہا کہ آئینی عہدوں کو پوری دنیا میں عزت دی جاتی ہے، امریکا و برطانیہ کو دیکھ لیں، صدر یا وزیر اعظم کی مدت عہدہ ختم ہونے کے بعد بھی عزت و احترام کیا جاتا ہے، یہ ہمارے ہاں ہی رواج ہے کہ ہر وقت کوئی نہ کوئی وزیر اعظم یا صدر جیل میں ہوتا ہے،اب سارے اختیارات جوڈیشل کمیشن کے پاس ہیں۔

(جاری ہے)

انہوںنے کہاکہ معرکہ حق کی جیت سے پوری قوم کا پوری دنیا میں سر بلند ہوا، آرمی چیف کی تعیناتی کا اختیار وزیر اعظم کے پاس ہے۔رانا ثناء اللہ نے کہاکہ آئین میں ترمیم کسی شخصیت یا سیاسی مقصد کے لیے نہیں کی گئی، آئینی عدالت کے ججوں کے انٹرویو جوڈیشل کمیشن کرے گا، پہلی تعیناتی وزیر اعظم کی ایڈوائس پر ہو گی کیونکہ جوڈیشل کمیشن موجود نہیں ہو گا۔