Live Updates

اسلامی ممالک کے مسائل کے حل کے لئے مشترکہ پالیسی اپنانا ہوگی،حافظ نعیم الرحمن

پیر 24 نومبر 2025 14:42

لاہور (اُردو پوائنٹ اخبارتازہ ترین - اے پی پی۔ 24 نومبر2025ء) امیر جماعت اسلامی پاکستان حافظ نعیم الرحمن نے کہا ہے کہ اسلامی ممالک کے مسائل کے حل کے لئے مشترکہ پالیسی اپنانا ہوگی، ہم سب کو مل کر غزہ،کشمیر،روہنگیا،سوڈان اور ظلم و جبر کا شکار مسلم علاقوں کے لئے آواز اٹھانی چاہیے۔ ان خیالات کا اظہار انہوں نے پیر کویہاں جماعت اسلامی کے زیر اہتمام مقامی ہوٹل میں منعقدہ عالمی گول میز کانفرنس کے شرکا سے خطاب کرتے ہوئے کیا۔

عالمی کانفرنس میں 40 سے زائد ممالک کے مندوبین شریک ہوئے۔انہوں نے کہا کہ آج یہاں اکٹھے ہونے کا مقصد انسانیت کو درپیش مسائل سے آگاہ کرنا ہے۔انہوں نے کہا کہ مسلم ممالک کو بڑے چیلنجز کا سامنا ہے۔ حافظ نعیم الرحمن نے کہا کہ انسانیت کا تقدس عالمی نعرہ ہونا چاہیے ۔

(جاری ہے)

انہوں نے کہا کہ جموں و کشمیر میں مسلمانوں کی نسل کشی کی جارہی ہے، ہمار ا مطالبہ ہے کشمیر کا مسئلہ اقوام متحدہ کی قرار دادوں کے مطابق حل کیا جائے۔

انہوں نےکہا کہ ہمیں اسلامی ممالک کے درمیان مسائل کے حل کیلئے ایک مکمل حکمت عملی اپنانے کی ضرورت ہے۔ سابق وفاقی وزیر مشاہد حسین سید نے کہا کہ معاشی و سیاسی طاقت مغرب سے مشرق کی طرف منتقل ہورہی ہے، پاکستان،ملائیشیا،انڈو نیشیا،ترکیہ،ایران سعودی عرب کی دنیا میں اہمیت بڑھ رہی ہے۔