مضر صحت گوشت، زائد المیعاد فوڈ آئٹمز، گٹکا اور غیر معیاری ڈیری پراڈکٹس کے خلاف پورا سال کاروائیاں جاری رہیں، فو ڈ اتھارٹی

مضر صحت خوراک پر فوڈ اتھارٹی نے 1471 دکانوں کو 2 کروڑ 20 لاکھ 28 ہزار روپے جرمانہ عائد کیا، سالانہ کارکردگی رپورٹ

بدھ 31 دسمبر 2025 18:50

اسلام آباد(اُردو پوائنٹ اخبارتازہ ترین - این این آئی۔ 31 دسمبر2025ء) اسلام آباد فوڈ اتھارٹی کی جانب سے 2025 کا اختتام پر سالانہ کارکردگی رپورٹ جاری کر دی گئی جس کے مطابق مضر صحت گوشت، زائد المیعاد فوڈ آئٹمز، گٹکا اور غیر معیاری ڈیری پراڈکٹس کے خلاف پورا سال کاروائیاں جاری رہیں2025 کے دوران مجموعی طور پر 12 ہزار 697 کاروائیاں کی گئیں اور 230 فوڈ سیمپل اٹھائے گئے، مضر صحت خوراک پر فوڈ اتھارٹی نے 1471 دکانوں کو 2 کروڑ 20 لاکھ 28 ہزار روپے جرمانہ عائد کیا، اسلام آباد میں حفظان صحت کے اصولوں کی خلاف ورزی پر 700 فوڈ پوائنٹس سیل کیے گئے۔

(جاری ہے)

رپورٹ کے مطابق اسلام آباد فوڈ اتھارٹی کی جانب سے ایک سال میں 4 ہزار 786 فوڈ پوائنٹس کو لائسنس کا اجراء کیا گیا،فوڈ اتھارٹی نے بڑی خلاف ورزیوں پر 15 فوڈ پوائنٹس کے خلاف مقدمات بھی درج کروائے۔ سالانہ رپورٹ کے مطابق دوران کاروائی مجموعی طور پر 2 لاکھ 48 ہزار 703 کلو گرام مضر صحت خوراک کو تلف کیا گیا۔ حکام کے مطابق اسلام آباد فوڈ اتھارٹی شہر میں بہتر اور صحت مند غذا کی دستیابی یقینی بنانے کے لیے کوشاں ہے۔ڈائریکٹر فوڈ اتھارٹی کے مطابق شہری مضر صحت خوراک کی نشاندہی کرکے اسلام آباد فوڈ اتھارٹی کے ’’صحت مند اسلام آباد‘‘ مقصد کو کامیاب بنائیں۔