وائس چانسلرجامعہ سرگودھا کی گورنرپنجاب و چانسلرسے ملاقات، یونیورسٹی کی تعلیمی،تحقیقی اورترقیاتی سرگرمیوں پربریفنگ دی

سرگودھا (اُردو پوائنٹ اخبارتازہ ترین - اے پی پی۔ 08 جنوری2026ء) یونیورسٹی آف سرگودھا کے وائس چانسلر پروفیسر ڈاکٹر قیصر عباس نے گورنر پنجاب و چانسلر یونیورسٹیز سردار سلیم حیدر سے ملاقات کی اور اُنہیں یونیورسٹی کی تعلیمی، تحقیقی اور ترقیاتی سرگرمیوں پر تفصیلی بریفنگ دی۔ ملاقات کے دوران وائس چانسلر نے گورنر کو آگاہ کیا کہ یونیورسٹی آف سرگودھا میں اس وقت 25 ہزار سے زائد طلبہ زیرِ تعلیم ہیں جبکہ اتنی ہی تعداد یونیورسٹی سے منسلک کالجز میں زیر تعلیم طلبہ کی ہے۔

اُنہوں نے بتایا کہ یونیورسٹی اپنے انکیوبیشن سینٹر کے ذریعے طلبہ میں اختراع، جدت اور کاروباری صلاحیتوں کے فروغ کے لیے عملی اقدامات کر رہی ہے، جہاں طلبہ کے کاروباری منصوبوں کی معاونت کی جا رہی ہے۔

(جاری ہے)

پروفیسر ڈاکٹر قیصر عباس نے گورنر کو یونیورسٹی کی بین الاقوامی سطح پر بڑھتی ہوئی سرگرمیوں بالخصوص چین کے ساتھ بڑھتے تعلیمی تعاون کے بارے میں آگاہ کیا۔

انہوں نے بتایا کہ یونیورسٹی آف سرگودھا چین کے صوبہ ہینان میں ایک مشترکہ تعلیمی کیمپس قائم کرنے کے عمل میں ہے، جو کسی بھی پاکستانی پبلک سیکٹر یونیورسٹی کا پہلا بیرونِ ملک کیمپس ہوگا۔وائس چانسلر نے مزید بتایا کہ یونیورسٹی نے مشترکہ تحقیقی وٹیکنالوجی مراکز، جوائنٹ ڈگری پروگرامز اور بین الاقوامی تربیتی منصوبوں کے قیام کے لیے مختلف معاہدے کیے ہیں، جن میں ٹیکنالوجی، میری ٹائم ایجوکیشن اور ڈیجیٹل انوویشن جیسے اہم شعبے شامل ہیں۔

انہوں نے یہ بھی بتایا کہ ایک اور اہم پیش رفت کے طور پر چین کے شہر سانیا، ہینان صوبہ میں ایک بین الاقوامی اسپتال کے قیام کے لیے معاہدے پردستخط کیے جا چکے ہیں، جس سے یونیورسٹی کی عالمی نمائندگی مزید مستحکم ہوگی۔تحقیقی سرگرمیوں کے حوالے سے وائس چانسلر نے گورنر کو دوسرے سالانہ ریسرچ ایرینا کے کامیاب انعقاد کے بارے میں بتایا، جس کے دوران 100 سے زائد تحقیقی اور تعلیمی سرگرمیاں منعقد کی گئیں، جو یونیورسٹی کی مضبوط اور فروغ پاتی تحقیقی ثقافت کی عکاسی کرتی ہیں۔

اُنہوں نےیونیورسٹی کےخود انحصاری اورپائیدارترقی کے منصوبوں پر بھی روشنی ڈالی، جن میں مختلف کیمپسز میں شمسی توانائی پر منتقلی شامل ہے،جویونیورسٹی نےاپنے داخلی وسائل سے مکمل کی ہے۔اس موقع پر گورنر پنجاب سردار سلیم حیدر نے معیاری تدریس، مؤثر تحقیق اور وژن رکھنے والے طلبہ کو پاکستان کے عالمی تعلیمی تشخص کے فروغ کے لیے ناگزیر قرار دیا۔

انہوں نے خطے اور ملک کی ترقی سے متعلق منصوبوں کے لیے مکمل تعاون کی یقین دہانی کرواتے ہوئے جامعات کے اصل مقصد، یعنی علم اور ترقی کے فروغ، پر زور دیا۔سردار سلیم حیدر نے مزید کہا کہ یونیورسٹی آف سرگودھا نہ صرف صوبہ پنجاب بلکہ پورے ملک میں اعلیٰ تعلیم، تحقیق اور بین الاقوامی تعاون کے فروغ میں اہم کردار ادا کر رہی ہے۔ انہوں نے وائس چانسلر کی قیادت میں یونیورسٹی کی تعلیمی ترقی، عالمی شراکت داریوں اور طلبہ کو جدید تقاضوں سے ہم آہنگ کرنے کی کاوشوں کو سراہتے ہوئے کہا کہ ایسی جامعات ہی پاکستان کا مثبت تشخص دنیا کےسامنےاُجاگرکرتی ہیں۔

گورنر نے اس عزم کا اظہار کیا کہ وہ یونیورسٹی آف سرگودھا کے تعلیمی، تحقیقی اور ترقیاتی منصوبوں میں ہر ممکن تعاون جاری رکھیں گے۔بعدازاں وائس چانسلر پروفیسر ڈاکٹر قیصر عباس نے گورنر پنجاب کو یونیورسٹی آف سرگودھا کے 12ویں کانووکیشن کی صدارت کی باضابطہ دعوت دی، جسے چانسلر سرگودھا یونیورسٹی نے قبول کر لیا۔