وزیراعظم لیپ ٹاپ سکیم فیز 4 کے تحت علامہ اقبال اوپن یونیورسٹی ریجنل کیمپس ملتان میں لیپ ٹاپ تقسیم

ہفتہ 14 فروری 2026 17:28

خانیوال (اُردو پوائنٹ اخبارتازہ ترین - اے پی پی۔ 14 فروری2026ء) وزیر اعظم لیپ ٹاپ سکیم فیز 4 کے تحت علامہ اقبال اوپن یونیورسٹی ریجنل کیمپس ملتان میں جنوبی پنجاب کے 5ریجن ملتان،ڈیرہ غازی خان،بہاولپور،وہاڑی اور رحیم یار خان کے 246 ہونہار طلباء وطالبات میں شفاف طریقے سے میرٹ پر آنے والے طلباء و طالبات میں وائس چانسلر پروفیسر ڈاکٹر ناصر محمود نے لیپ ٹاپ تقسیم کئے۔

تقریب میں ڈائریکٹر جنرل ریجنل سروسز ڈاکٹر ملک توقیر احمد خان، ڈین فیکلٹی آف سائنسزپروفیسر ڈاکٹر شیرمحمد، رجسٹرارمیجر راجہ عمر یونس،ڈائریکٹر سٹوڈنٹ افیئرزسید غلام کاظم علی، ریجنل ڈائریکٹر ملتان غلام حسین کھوسہ، ڈپٹی ریجنل ڈائریکٹر شاہدہ تنویر اور دیگر ریجنل ڈائریکٹرز کے علاوہ طلباء وطالبات بھی تقریب میں موجود تھے۔

(جاری ہے)

تقریب سے خطاب کرتے ہوئے وائس چانسلر علامہ اقبال اوپن یونیورسٹی پروفیسر ڈاکٹر ناصر محمودنے کہا کہ پاکستان کی 155یونیورسٹیوں میں سے علامہ اقبال اوپن یونیورسٹی کے طلبہ کے حصے میں ایک لاکھ میں سے 2500سے زائد لیپ ٹاپ آئے ہیں جو شفاف طریقے سے میرٹ پر آنے والے طلباء و طالبات میں تقسیم کئے گئے جو کہ ان طالبعلموں کی تعلیمی ضروریات کو پورا کرنے کیلئے بہترین مددگار ثابت ہونگے۔

پروفیسر ڈاکٹر ناصر محمودنے مزید کہا کہ آج کل پوری دنیا میں تعلیمی ادارے ڈیجیٹلائزیشن پر منتقل ہو رہے ہیں مگرعلامہ اقبال اوپن یونیورسٹی دنیا کی واحد یونیورسٹی ہے جو 50سال سے ڈیجیٹل طریقے سے طلباء وطالبات کو تعلیم دے رہی ہے جو کہ پاکستان کے لئے ایک اعزا ز ہے۔تقریب سے خطاب کرتے ہوئے ڈائریکٹر جنرل ریجنل سروسز ڈاکٹر ملک توقیر احمد خان نے کہا کہ لیپ ٹاپ کے ذریعے دور دراز علاقوں کے رہائشی طلباء وطالبات کو دور جدید کے تعلیمی تقاضوں کو پورا کرنے میں خاطر خواہ مدد ملے گی۔\378