خواجہ سلمان رفیق کی پی آئی سی آمد،امراض قلب کے مریضوں کے گھروں میں ادویات کی فراہمی کے نظام کا جائزہ لیا

بدھ 25 مارچ 2026 23:26

لاہور (اُردو پوائنٹ اخبارتازہ ترین - اے پی پی۔ 25 مارچ2026ء) صوبائی وزیر صحت خواجہ سلمان رفیق نے پنجاب انسٹی ٹیوٹ آف کارڈیالوجی کا دورہ کیا۔وزیر اعلی ایڈلٹ کارڈیک سرجری پروگرام کے تحت سرجری کروانے آئے بزرگ مریض سے ملاقات کی۔صوبائی وزیر نے مریض کو پروگرام کا کارڈ بھی دیا۔خواجہ سلمان رفیق نے امراض قلب کے مریضوں کے گھروں میں ادویات کی فراہمی کے نظام کا بھی جائزہ لیا،عملہ سے ملاقات کی اور موقع پر موجود عملہ کو نظام میں مزید بہتری کی ہدایت بھی کی۔

اس موقع پر چیئرمین وزیر اعلی پنجاب ایڈوائزری کمیٹی برائے امراض قلب ڈاکٹر فرقد عالمگیر، سپیشل سیکرٹری آپریشنز محکمہ سپیشلائزڈ ہیلتھ کیئر اینڈ میڈیکل ایجوکیشن نبیلہ عرفان، ایگزیکٹو ڈائریکٹر پی آئی سی پروفیسر بلال محی الدین، ایم ایس ڈاکٹر عامر رفیق بٹ، پروفیسر احمد نعمان، ڈاکٹر سید عمران و دیگر فیکلٹی ممبران موجود تھے۔

(جاری ہے)

صوبائی وزیر صحت خواجہ سلمان رفیق نے اظہار خیال کرتے ہوئے کہا کہ وزیر اعلی مریم نواز کے وژن کے مطابق ایڈلٹ کارڈیک سرجری پروگرام کے مریضوں کو ثمرات حاصل ہونا شروع ہو گئے ہیں،پروگرام کے تحت سرجری کا انتظار کرنے والے ہزاروں مریضوں کی ویٹنگ لسٹ میں واضح کمی لائی جائے گی۔

انہوں نے کہا کہ وزیر اعلی پنجاب کے تاریخی و انقلابی صحت اقدامات گیم چینجر ثابت ہوں گے،حکومت پنجاب کے شعبہ صحت کے منفرد پروگراموں کے ذریعے ہزاروں مریضوں کو اربوں روپوں کے علاج معالجہ کی سہولیات فراہم کر چکے ہیں ۔