جیکب آباد پولیس کی منشیات و گٹکا اسمگلنگ کے خلاف کارروائیاں، بھاری مقدار میں چرس و گٹکا برآمد، چار ملزمان گرفتار

بدھ 22 اپریل 2026 19:48

جیکب آباد (اُردو پوائنٹ اخبارتازہ ترین - این این آئی۔ 22 اپریل2026ء) جیکب آباد پولیس کی منشیات و گٹکا اسمگلنگ کے خلاف کارروائیاں، بھاری مقدار میں چرس و گٹکا برآمد، چار ملزمان گرفتار۔

(جاری ہے)

تفصیلات کے مطابق ایس ایس پی جیکب آباد کیپٹن (ر) فیضان علی کے احکامات پر منشیات اور گٹکا اسمگلنگ کے خلاف جیکب آباد پولیس کی کارروائیوں کا سلسلہ جاری ہے، مختلف کارروائیوں کے دوران منشیات و گٹکا اسمگلنگ میں ملوث تین ملزمان سمیت چار ملزمان کو گرفتار کرلیا گیا جبکہ بھاری مقدار میں چرس اور مضر صحت گٹکا برآمد کرلیا گیا، پولیس ترجمان کے مطابق سی آئی اے پولیس نے خفیہ اطلاع پر ممل روڈ کے قریب کارروائی کرتے ہوئے ایک کار سے 7 کلو گرام چرس اور 285 کلو گرام گٹکا برآمد کرلیا، پولیس نے موقع پر کارروائی کرتے ہوئے دو ملزمان خالد حسین اور محمد زوہیب کو گرفتار کرلیا جبکہ گاڑی کو تحویل میں لے کر قانونی کارروائی کردی گئی ہے، دوسری کارروائی میں تھانہ صدر پولیس نے بقا پل کے قریب ایک ملزم محمد اکرم ڈومکی کو گرفتار کرلیا جس کے قبضے سے 3450 گرام گٹکا اور 76 پیکٹ نان کسٹم پیڈ سگریٹ برآمد ہوئے، پولیس نے ملزم کے خلاف مقدمہ درج کرلیا ہے، ادھر تھانہ گڑہی حسن پولیس نے اسنیپ چیکنگ کے دوران ایک مطلوب ملزم نثار احمد سرکی کو گرفتار کرلیا جو تھانہ اے سیکشن ٹھل میں درج مقدمہ نمبر 14/2026 میں مطلوب تھا، ایک اور کارروائی میں تھانہ آباد پولیس نے ڈکیتی کے دوران شہری غوث بخش بروہی سے چھینی گئی موٹر سائیکل، موبائل فونز اور دیگر سامان برآمد کرکے تصدیق کے بعد اصل مالک کے حوالے کردیا۔