خواتین کے حقوق کا تحفظ وانصاف کی فراہمی ترجیح ہے، سردارسلیم حیدر خان

ہفتہ 25 اپریل 2026 20:12

لاہور (اُردو پوائنٹ اخبارتازہ ترین - اے پی پی۔ 25 اپریل2026ء) گورنر پنجاب سردار سلیم حیدر خان نے کہاہے کہ خواتین کے حقوق کا تحفظ اور انصاف کی فراہمی ترجیح ہے،جامعات میں خواتین و طالبات کے خلاف ہراسمنٹ پر زیرو ٹالرنس کی پالیسی اپنائی ہے۔ان خیالات کا اظہار انہوں نے ہفتہ کے روز یہا ں گورنر ہائوس لاہور میں خاتون محتسب پنجاب ڈاکٹر نجمہ افضل خان سے ملاقات کے دوران گفتگو کرتے ہوئے کیا۔

اس موقع پر خواتین کے حقوق کے تحفظ، ہراسانی کے خلاف اقدامات اور ادارہ جاتی تعاون کو مزید موثر بنانے پر تفصیلی تبادلہ خیال کیا گیا۔ گورنر پنجاب نے ڈاکٹر نجمہ افضل خان کو خاتون محتسب پنجاب کا عہدہ سنبھالنے پر مبارکباد دی،نیک خواہشات کا اظہار کیا اورکہا کہ خواتین کو محفوظ وبااختیار بنانا حکومت کی اولین ترجیحات میں شامل ہے۔

(جاری ہے)

سردار سلیم حیدر خان نے کہا کہ خاتون محتسب کا آفس خواتین کو جائیداد میں ان کا وراثتی حق دلانے میں موثر کردار ادا کر رہا ہے جو قابل تعریف ہے۔

گورنر پنجاب نے کہا کہ خواتین کے حقوق کے فروغ اور ان کے مسائل کے حل کے لیے گورنر آفس ہر ممکن تعاون فراہم کرے گا۔انہوں نے اس بات پر زور دیا کہ خواتین کو درپیش مسائل کے حل کے لیے آگاہی مہمات کو مزید تیز کیا جائے۔گورنر پنجاب نے ہدایت کی کہ متعلقہ اداروں کے درمیان روابط کو مضبوط بنایا جائے تاکہ خواتین کو بروقت اور موثر انصاف فراہم کیا جا سکے۔

انہوں نے مزیدکہا کہ بطور چانسلر یونیورسٹیوں میں خواتین و طالبات کے خلاف ہراسمنٹ پر زیرو ٹالرنس کی پالیسی اپنائی ہے۔اس موقع پر خاتون محتسب پنجاب ڈاکٹر نجمہ افضل خان ڈاکٹر نجمہ افضل خان نے گورنر پنجاب کو ادارے کی کارکردگی، جاری اصلاحات اور خواتین کو فوری انصاف کی فراہمی کے لیے کیے گئے اقدامات سے تفصیلی آگاہ کیا۔انہوں نے کہا کہ خاتون محتسب کا ادارہ صوبہ بھر میں خواتین کو جائیداد میں ان کا وراثتی حق دلانے کے لیے سب سے موثر اور با اختیار ہے۔ اسی طرح خاتون محتسب کا ادارہ صوبے بھر میں خواتین کو ہراسانی سے بچائو اور ان کی شکایات کے ازالے کے لیے فعال کردار ادا کر رہا ہے۔