راولپنڈی، گورنر پنجاب کا جامعہ تعلیم القرآن راجہ بازار کا دورہ، مرحوم مہتمم کے انتقال پر اظہارِ تعزیت

پیر 27 اپریل 2026 15:03

راولپنڈی (اُردو پوائنٹ اخبارتازہ ترین - اے پی پی۔ 27 اپریل2026ء) راولپنڈی میں گورنر پنجاب سردار سلیم حیدر خان نے جامعہ تعلیم القرآن راجہ بازار کا دورہ کیا، جہاں انہوں نے مدرسہ کے نائب مہتمم مفتی ولی اللہ سے ملاقات کی اور ادارے کے امور پر تبادلۂ خیال کیا۔ اس موقع پر جامعہ کے اساتذہ اور طلبہ بھی موجود تھے۔گورنر پنجاب نے جامعہ تعلیم القرآن راجہ بازار کے مہتمم مرحوم مولانا اشرف علی خان کے انتقال پر گہرے دکھ اور افسوس کا اظہار کرتے ہوئے کہا کہ مرحوم ایک جید عالم دین، بہترین معلم اور دینی خدمات کے حوالے سے نمایاں شخصیت تھے، جنہوں نے اپنی زندگی قرآن و سنت کی تعلیم و ترویج کے لیے وقف کیے رکھی اوران کا خلا مدتوں محسوس کیا جاتا رہے گا۔

انہوں نے مرحوم کے صاحبزادے اور نائب مہتمم مفتی ولی اللہ سے دلی تعزیت کا اظہار کرتے ہوئے کہا کہ حکومت پنجاب غم کی اس گھڑی میں لواحقین کے ساتھ کھڑی ہے۔

(جاری ہے)

گورنر پنجاب نے مرحوم کی دینی و علمی خدمات کو خراجِ عقیدت پیش کیا اور کہا کہ ایسے افراد قوم کا قیمتی اثاثہ ہوتے ہیں۔دریں اثناء گورنر پنجاب نے مرحوم مولانا اشرف علی خان کے ایصالِ ثواب کے لیے فاتحہ خوانی کی اور ان کے درجات کی بلندی کے لیے دعا کی۔

انہوں نے دعا کی کہ اللہ تعالیٰ مرحوم کو جوارِ رحمت میں اعلیٰ مقام عطا فرمائے اور پسماندگان کو صبر جمیل دے۔دورے کے اختتام پر گورنر پنجاب نے جامعہ کے تعلیمی و تدریسی نظام کو سراہتے ہوئے کہا کہ دینی مدارس معاشرے میں اخلاقی و روحانی تربیت کے فروغ میں اہم کردار ادا کر رہے ہیں اور حکومت ایسے اداروں کی خدمات کو قدر کی نگاہ سے دیکھتی ہے۔